Qyzylordada belgili dırıjerdi eske alý sharasy ótti

QYZYLORDA. QazAqparat - Qyzylordada belgili dırıjer Tólepbergen Ábdirashovti eske alýǵa arnalǵan jıyn ótti, dep habarlaıdy QazAqparat tilshisi.

Atalmysh ıgi shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda ótkizildi. Ol Qazaqstannyń halyq ártisi, «Qurmet» ordeniniń ıegeri, Syr elinen alǵashqy bolyp shyqqan ataqty dırıjer Tólepbergen Ábdirashovty eske alýǵa arnaldy.

Mádenı shara barysynda Qyzylorda oblystyq fılarmonııasy kameralyq orkestri kópshilikke kontsert usyndy.

Tólepbergen Ábdirashev 1948 jyldyń 26 shildesinde Jańaqorǵan aýdany Besaryq aýylynda dúnıege kelgen. Ónegeli ómir jolynda 1995 jyly Qazaqstannyń halyq artısi ataǵyna ıe boldy. 1974 jyly Almaty memlekettik konservatorııasyn bitirgen ol 1979 jyly Máskeý konservatorııasyn támamdady. 1979-82 jyldarda Almatyda Qazaq sımfonııalyq orkestriniń dırıjeri, 1985-87 jyldarda Qazaq opera jáne balet teatrynyń bas dırıjeri boldy. 1987 jyldan ómiriniń sońyna deıin Qazaq opera jáne balet teatrynyń kórkemdik jetekshisi ári bas dırıjeri qyzmetin atqardy.

Orkestrge Qazaqstannyń eńbek sińirgen qaıratkeri, tanymal dırıjer Músilim Ámze dırıjerlik etti. Kontsertte uly aqyn Abaı Qunanbaev pen Qazaqstannyń halyq artısi Ǵazıza Jubanova, tanymal klassıkalyq kompozıtor Volfgang Motsart pen basqa da álemdik klassıka sheberleriniń shyǵarmalary oryndaldy.