Qyzylordada «Baıqońyr ınvest» forýmy aıasynda kúrish óńdeý zaýyty ashyldy
QYZYLORDA. QazAqparat - Sońǵy jyldary oblys kúrishshileri mol ónim alýda. Ústimizdegi jyly aımaq tarıhynda buryn-sońdy bolmaǵan 500 myń tonnadan astam kúrish jınaldy.
Sonymen qatar, bıyl oblysta ırandyq kúrishtiń «Torem Hoshemı» sorty egildi. Al búgin "Baıqońyr ınvest" forýmy aıasynda Qyzylorda kúrishiniń sortyn Iran Islam Respýblıkasyna jetkizý týraly memorandýmǵa qol qoıyldy. Bul týraly QazAqparat tilshisi habarlady.
Qazirgi tańda qyzylordalyq kúrish ósirýshiler óz ónimderin álemdik naryqqa shyǵarýǵa jumys isteýde.
«Abaı Daýlet» JShS Qyzylordada kúrish óńdeıtin zaýyt saldy.
Qazirgi tańda kásiporynda 80 adam jumys jasaıdy. Aldaǵy ýaqytta jumysshylardyń sanyn 100-ge deıin jetkizý josparlanýda.
Oblys ákimi Qyrymbek Kósherbaev zaýyt ujymyna sáttilik tilep, Sotsıalıstik Eńbek Eri Amangeldi Ahmetov kúrishshilerge jyly lebizin jetkizdi.
«Abaı Daýlet» JShS basshysy Daýlet Sarsenbaevtyń aıtýynsha, zaýytta saǵatyna 7 tonna astyq qaıta óńdeledi. Kásiporynda qaldyqsyz óndiris qoldanylady.
