Qyzylordada bastaýysh mektep paıdalanýǵa berildi
Sońǵy ýaqytta Syr óńirinde bilim salasynda memlekettik-jekeshelik áriptestik negizinde ıilikti ister atqarylyp keledi. Qazirgi tańda oblys ortalyǵynda 4 jeke mektep jumys isteıdi. Onda jan basyna qarjylandyrý boıynsha memlekettik tapsyrystar berilgen. «Orda School» bastaýysh mektebi zamanaýı qural-jabdyqtarmen jabdyqtalǵan. Bir mezgilde 700 oqýshyny qabyldaı alatyn jańa ǵımarat Qyzylorda qalasynyń jańa bóliginde ornalasqan.
Sondaı-aq, Qyzylordada jyl saıyn jekemenshik balabaqshalar jelisi artyp keledi. Qazir balabaqshanyń 72 paıyzy jeke sektordyń úlesinde. Nátıjesinde, 3-6 jastaǵy balalar mektepke deıingi tárbıemen tolyqtaı qamtylǵan. Oblysta úsh aýysymdy jáne apatty mektepterdiń máselesi de tolyq sheshilgen. Aımaq mektepteriniń 60 paıyzy jańa modıfıkatsııalyq pándik kabınettermen qamtamasyz etilip, kompıýterler tolyqtaı jańartylǵan.
«Orda School» bastaýysh mektebiniń ashylýyna QR Parlamenti Senatynyń depýtattary, oblys ákimi Qýanyshbek Ysqaqov qatysty. QR Bilim jáne ǵylym vıtse-mınıstri Sholpan Karınova Parlament Senatynyń tóraǵasy Darıǵa Nazarbaeva men vıtse-premer Berdibek Saparbaevtyń quttyqtaý hattaryn tabystady.
«Táýelsizdigimizdi alǵan ýaqyttan beri Tuńǵysh Prezıdent – Elbasy Nursultan Ábishuly Nazarbaevtyń qamqorlyǵymen bilim salasyna, jas urpaqqa sapaly bilim berýge udaıy kóńil bólinip keledi. «Keleshektiń kilti – bilimdi urpaqtyń qolynda» degen qaǵıdat berik qalyptasty. Bıylǵy jyly tamyz aıynda elordamyz – Nur-Sultan qalasynda ótken respýblıkalyq tamyz konferentsııasynda Qazaqstan Respýblıkasynyń Prezıdenti Qasym-Jomart Kemeluly Toqaev bilim salasyndaǵy birqatar ózekti máselelerge toqtalyp, olardy kezeń-kezeńimen sheshýdi tapsyrdy. Sondaı-aq, Memleket basshysy alǵashqy Joldaýynda pedagogtardyń mártebesin kóterý, bilim sapasyn arttyrý, eńbek naryǵyna sapaly mamandar daıarlaý, aýyl mektepteriniń jaǵdaıyn jaqsartý máselelerimen birge, bala tárbıesine qatysty naqty basymdyqtardy aıqyndap berdi»,- dedi oblys ákimi Q.Ysqaqov.
