Qyzylordada baspanasyz jalǵyzbasty anaǵa aýyldastary úı alyp berdi

QYZYLORDA. QazAqparat - Qyzylorda oblysy Jalaǵash aýdanyna qarasty Qaraketken aýylynyń turǵyndary baspanaǵa muqtaj jalǵyzbasty anaǵa turǵyn úı tartý etti, dep habarlaıdy QazAqparat tilshisi.

Bir ul, bir qyz tárbıelep otyrǵan jalǵyzbasty ana Aınur Naýanova uzaq jyldan beri baspanasyz qıyndyq kórip kele jatqan edi. Bul otbasynyń turmystyq ahýalynan habardar jerlesteri ortaq baılamǵa kelip, oǵan qol ushyn sozýdy qup kórdi. Nátıjesinde barlyǵy qarjylaı kómektesip, Táýelsizdik merekesi qarsańynda atalmysh otbasy baspanaǵa qol jetkizdi. Qamqorlyq tanytqan azamattar qatarynda jergilikti kásipkerler, ózge de qarjyly azamattar, aýyldyń qarapaıym turǵyndary bar.

«Aýyl turǵyndary osylaısha aýyzbirliktiń úlgisin kórsetti. Qaıyrymdy jandar tek jaqsylyq jasaýmen shektelgen joq. Óskeleń urpaqqa ulaǵat syılaıtyn izgilikti isti pash etti», - dedi Nur Otan partııasy aýdandyq fılıaly tóraǵasynyń birinshi orynbasary Qanshagúl Mustafaeva.

Aınur Naýanovanyń qyzy Janerke arnaýly oqý ornyn támamdap, óz mamandyǵy boıynsha eńbek etip keledi. Al uly Baǵdat mektepte jetinshi synypta oqıdy.