Qyzylordada baspana alýdyń negizgi qaǵıdattary túsindirildi
QYZYLORDA. QazAqparat - Qyzylorda qalasyndaǵy halyq kóp shoǵyrlanatyn oryndardyń biri «Jaına» saýda úıinde «Baspana alýdyń negizgi qaǵıdattary» taqyrybynda aktsııa uıymdastyrdy, dep habarlaıdy QazAqparat tilshisi.
Atalmysh sharaǵa oblystyq ishki saıasat basqarmasymen birlesip «Týǵan jer» qoǵamdyq qozǵalysy» qaýymdastyǵy qoldaý bildirdi. Atalmysh is-sharaǵa qaýymdastyq mamandarymen birge «Turǵyn úı qurylys jınaq bankiniń» menedjeri Myrzaıym Mahataeva shaqyryldy.
Aktsııa barysynda eń mańyzdy máselege aınalǵan turǵyn úı taqyryby jaıynda keńinen aqparat berildi. «Turǵyn úı qurylys jınaq banki» arqyly turǵyn úılerdi usyný tártibi men memlekettik baǵdarlamalar arqyly turǵyn úı alýdyń jańa ári yńǵaıly júıeleri egjeı-tegjeıli túsindirildi.
Qordalanǵan saýaldarymen turǵyn úı qatynastary bólimine jıi baratyn halyq bundaı sharanyń tıimdiligin eskerip, belsendilik tanytty, baspanaly bolýdyń zańdylyǵymen tanysty.
«Elbasy jyl saıynǵy joldaýynda turǵyn úı qurylysyn damytýdyń baǵytyn aıqyndap, basymdyǵyn naqtylap, osy sala qyzmetkerlerine salmaqty mindet júktep keledi. Bıyl da baspana alýǵa qatysty jańa «7-20-25» memlekettik baǵdarlamasy aıqyndaldy. Aktsııa barysynda Qyzylorda oblysynda bastapqy tólemsiz turǵyn úı alýǵa múmkindik beretin «Orda» baǵdarlamasy da túsindirildi», - dedi Myrzaıym Mahataeva.
Ádiljan Úmbet
