Qyzylordada bas shyrshanyń oıynshyqtaryna urlyqqa túse bastady
QYZYLORDA. QazAqparat-Ótken túnde qalalyq ishki ister basqarmasynyń Jedel basqarý ortalyǵynyń kezekshi-ınspektory kóshe boıyna ornatylǵan beınekamera arqyly ortalyq alańǵa ornatylǵan jańajyldyq bas shyrshanyń oıynshyqtaryn urlap, jeke kóligimen izin sýytpaq bolǵan azamatty baıqap qaldy.
Oqıǵa ornyna dereý polıtsııa jasaǵy jiberildi. Nátıjesinde, 1982 jyly týǵan qala turǵyny ustaldy. Bul týraly QazAqparat HAA tilshisi habarlady.
Oblystyq ІІD-den málim etkendeı, qazirgi tańda atalǵan derek boıynsha sotqa deıingi tergep-tekserý amaldary júrgizilýde.
Aıta keterlik jaıt, Qyzylorda oblysy ortalyǵynda quqyqbuzýshylyqtar men qylmystardyń aldyn alý, oryn alǵan urlyq qylmystaryn der kezinde ashý men jol qozǵalysy erejesin buzǵandardy anyqtaý maqsatynda adam kóp shoǵyrlanatyn oryndarǵa beınebaqylaý kameralary ornatyldy.
Jalpy oblys ortalyǵynda 272 beınekamera bar bolsa, olardyń barlyǵy Qyzylorda qalalyq ІІB-niń Jedel basqarý ortalyǵyna qosylǵan. Jyl basynan beri atalǵan beınekameralardyń kómegimen 8 qylmystyń beti ashylyp, 1606 ákimshilik quqyqbuzýshylyq anyqtaldy.
