Qyzylordada barlyq sport úıirmelerine tegin qatysýǵa bolady

QYZYLORDA. QazAqparat - Qyzylorda qalasyndaǵy barlyq sporttyq nysandardaǵy úıirmelerge tegin qatysýǵa múmkindik qarastyrylǵan. Oǵan 4-17 jas aralyǵyndaǵy balalar bara alady, dep habarlaıdy QazAqparat tilshisi.

Oblys ákimi Gúlshara Ábdiqalyqova Qyzylorda qalasynda ornalasqan birqatar sporttyq nysandardy aralap, onda úıermelerde sheberligin shyńdap júrgen jasóspirimdermen kezdesip, jattyqtyrýshylarmen pikirlesti.

Aldymen aımaq basshysy «Muz aıdyny» kesheninde boldy. Qazir munda 615 bala grek-rım kúresi, kórkem gımnastıka, shaıbaly hokkeı, short-trek, mánerlep syrǵanaý, voleıbol, basketbol syndy sporttyń 7 túrine tartylǵan.

Kezdesýde oblys ákimine grek-rım kúresinen jattyqtyrýshy Almat Áýeshov jastardyń sportqa degen belsendiliginiń jyl sanap artyp jatqanyn tilge tıek etti. Al kórkem gımnastıkadan tálim alyp júrgen Ásel Marat sportqa degen ynta-jigeriniń joǵary ekenin aıtyp, daıyndyq barysyndaǵy erekshe sátterimen bólisti.

Odan keıin aımaq basshysy «Tarlan» sport keshenin aralady. 2016 jyly paıdalanýǵa berilgen nysanda 120 sportshyǵa arnalǵan korpýs, 24 oryndyq jataqhana salynǵan. Keshen ashylǵaly 20 QR sport sheberi, 78 QR sport sheberine úmitker daıyndaldy.

Keshende balalarǵa arnalǵan 3 jattyǵý zaly qaralǵan. Munda boks, taekvondo, paýerlıftıngten 350 sportshy shuǵyldanýda.

Júzdesý barysynda oblys ákimine bokstan oblystyń aǵa jattyqtyrýshysy Jámil Júsipov balalar arasyndaǵy boks sportynyń qarqyny joǵary ekenin aıtyp ótti.

Aımaq basshysy «Nurym» jeke sport kesheniniń jumysymen de tanysty. Munda karate, qazaq kúresi, dzıýdo, taekvondo syndy sport túrinen 260 bala shynyǵýda.

Aıta ketý kerek, bıyldan bastap jeke sporttyq nysandarǵa baratyn balalar úshin tólenetin qarjyny jan basyna qarjylandyrý tártibimen retteý júzege asýda. Bul úshin oblystyq bıýdjetten 212 mıllıon teńge qarjy bólingen. Nátıjesinde 2156 bala sporttyq sektsııalarǵa qamtýǵa múmkindik aldy.

Júzdesý barysynda Gúlshara Ábdiqalyqova oblystyq dene shynyqtyrý jáne sport basqarmasynyń basshysy Jaqsylyq Ospanovqa balalar men jasópirimderdi sporttyq sektsııalarǵa belsendi túrde tartý jumystaryn áli de jandandyrýdy tapsyrdy. Sondaı-aq, sport sheberleri arqyly bolashaq chempıondardy shyǵarý máselesine jete nazar aýdarý qajettigin qaperge saldy.

Bıyl óńirde «Nursát» tennıs ortalyǵynyń 4 jabyq tennıs korty jáne baıdarka, kanoede esý bazasynyń qurylystary aıaqtaldy. Sonymen birge «Aýyl - el besigi» baǵdarlamasy aıasynda 5 sport kesheniniń qurylysy bastalmaq.

Eske salsaq, budan buryn Qyzylorda jurtshylyǵy Qamshybek Qońqabaevqa kólik mingizdi.