Qyzylordada baldyrǵandar úshin eki balabaqsha esikterin aıqara ashty

QYZYLORDA. QazAqparat-Qazaqstan Respýblıkasy Táýelsizdiginiń 25 jyldyǵyna oraı Qazaly aýdanynda «Nuraı» jeke balabaqshasy paıdalanýǵa berildi, dep habarlady «QazAqparat» HAA tilshisi aýdandyq ákimdikke silteme jasap.

Balabaqshanyń ashylý saltanatyna aýdan ákimi Najmadın Shamuratov qatysyp, búldirshinderdiń qýanyshymen bólisti. Memlekettik-jeke menshik áriptestik aıasynda paıdalanýǵa berilgen balabaqshada 75 bala tárbıelenetin bolady. Eki qabatty ǵımaratta jas órenderdiń  tárbıe men bilim alýyna qajetti jaǵdaıdyń  barlyǵy bar. Mektepke deıingi bilim berý nysanynyń qurylysyna 75 mln. teńge  qarjy jumsalǵan.

Aıta keteıik, osy kúni Qazaly aýdanynda 27 balabaqsha, 32 shaǵyn ortalyq, barlyǵy 59 mektepke deıingi uıym jumys jasap tur. 3-6 jasqa deıingi balalar balabaqshamen 100 paıyz qamtylǵan.

Búgin sondaı-aq, Shıeli aýdanynda kúrdeli jóndeýden ótken "Jadyra" balabaqshasy qaıta paıdalanýǵa berildi. Balabaqshanyń kúrdeli jumystaryna aýdandyq bıýdjetten 133 mln. teńge qarjy bólindi. Balabaqshanyń  ashylý saltanatynda sóz alǵan aýdan ákimi Q. Sársenbaev tárbıeshiler men ata-analardy el Táýelsizdiginiń 25 jyldyǵymen quttyqtady. 

Aýdanda búgingi kúni 17 memlekettik, 49 jeke balabaqsha, 48 shaǵyn ortalyq jumys jasaıdy. Shıeliniń 3-6 jastaǵy balalary mektepke deıingi bilimmen 100 paıyz qamtylǵan.