Qyzylordada «Balańa qaryzsyń ba? Alımentti tóle!» aktsııasy ótti

QYZYLORDA. QazAqparat - Qyzylorda oblysynda «Balańa qaryzsyń ba? Alımentti tóle!» aktsııasy ótkizildi. Bul týraly QazAqparat tilshisi oblystyq prokýratýraǵa silteme jasap habarlady.

 Atalǵan sharanyń maqsaty - alıment óndirý sanatyndaǵy atqarýshylyq óndiristerdiń oryndalýy tıimdiligin arttyrý.

 Aktsııany ótkizý barysynda Qyzylorda oblystyq prokýratýrasy men ýákiletti organdary alımentti óndirýge qatysty birneshe taqyryptyq beınerolıkter ázirledi.

 Qazirgi tańda  olar «Jibek joly» saýda ortalyǵynda ornalasqan kınoteatrda jáne jergilikti telearnalarda kórsetilýde.

Aktsııa aıasynda Qyzylorda qalasy, Aral, Qazaly, Jańaqorǵan aýdandary aýmaǵynda «Balańa alıment tóleý mindetiń!», «Óz balańa alıment tóle boryshker!» atty jazýlary bar avtokóliktermen avtosherýler  uıymdastyryp, turǵyndarǵa alıment tóleý mindettiligin nasıhattaıtyn únparaqshalar taratyldy.