Qyzylordada «Balalardyń bastaýy-2017» áleýmettik jobalar baıqaýy ótti
QYZYLORDA. QazAqparat - Oblystyq bilim basqarmasy uıymdastyrǵan balalardyń áleýmettik jobalar baıqaýy Qyzylorda qalasyndaǵy daryndy balalarǵa arnalǵan oblystyq «Bilim-ınnovatsııa» lıtseı - ınternatynda «Bolashaq energııasy» taqyrybynda ótti,-dep habarlady QazAqparat HAA tilshisi.
Baıqaý II - kezeń boıynsha 11 - 18 jas aralyǵyndaǵy oqýshylarynyń qatysýymen uıymdastyrylyp, onda jas jetkinshekterdiń 15 jobasy qaraldy.
Sharanyń maqsaty - balalardy belsendi azamattyq ustanymǵa tárbıeleý, óz qala, aýylynyń tynys - tirshiligine qatysý quqyqtary men daǵdylaryn qalyptastyrý, balalardyń bastamalaryn iske asyrý úshin alańdar qurý bolyp tabylady.
Jobalardy bilim salasynyń mamandary men «Nur Otan» partııasynyń ókilderi saraptady. Eń úzdik dep tanylǵan 3 joba respýblıkalyq kezeńge joldandy. Olar: Qazaly aýdanynyń № 258 orta mektep oqýshysy Edenbaeva Aıda, Qarmaqshy aýdanynyń №269 orta mektep oqýshysy Aımaǵanbetov Dáýlet, Qyzylorda qalasynyń № 267 orta mektep oqýshysy Sársenbaeva Arýjan.
Jeńimpazdardyń jobalary Balalardyń quqyqtaryn qorǵaý komıtetiniń www.bala-kkk.kz resmı saıtynda jáne «Balalar bastaýy - 2017» áleýmettik jobalar jınaǵynda jarııalanatyn bolady.
