Qyzylordada balalar oıyn-saýyq ortalyǵy órtendi
Oqys oqıǵa búgin, 19 shildede saǵat 07.20-da Qyzylorda qalasy Y.Altynsarın kóshesi boıynda ornalasqan balalar oıyn-saýyq ortalyǵynda boldy. Mamandar órt gaz-aýa qospasy saldarynan shyqqan bolýy múmkin ekenin jetkizdi. Ǵımarattyń birinshi qabatynyń 200 sharshy metrge jýyq aýmaǵy tolyqtaı janyp ketti.
«Órt saldarynan Jeńis kóshesi boıyndaǵy turǵyn úıdiń aǵash saraıy men shatyry qulap, terezesi búlindi. Oqıǵa ornyna órt sóndirý qyzmetinen 42 qyzmetker 11 tehnıkasy, al jedel qutqarý jasaǵynyń 6 qutqarýshysy 1 tehnıkasy bardy. Zardap shekkender men qaza bolǵandar joq. Órttiń sebep-saldyry anyqtalýda», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Eske sala ketsek, budan buryn Qyzylordada Tájikstannan Reseıge 20 tonna orama jip alyp bara jatqan júk kóligi órtendi.
