Qyzylordada balabaqsha ıesi kelmegen balalarǵa bólingen 7,9 mln teńgeni jymqyrdy

QYZYLORDA. QazAqparat - Qyzylorda oblysy Qazaly aýdanynda jekemenshik balabaqsha ıesi balabaqshaǵa kelmegen 58 bala esebinen memleketten bólingen 7 mln 932 myń teńgeni qoldy etken, dep habarlaıdy QazAqparat tilshisi.

Basty sot talqylaýynda kýálik etken ata-analardyń aıtýynsha, bul tizimde áldeqashan mektepte oqyp júrgen balalar da bar.

Qyzylorda oblystyq soty jekemenshik balabaqshaǵa qatysty atalmysh istiń núktesin qoıdy. Qyrýar qarjyny qoldy etken balabaqsha meńgerýshisine jaza taǵaıyndaldy. Ol QR Qylmystyq kodeksiniń 190-baby -bóliginiń 1-tarmaǵymen aıyptaldy. Balabaqsha meńgerýshisine 6 jylǵa bas bostandyǵynan aıyrý jazasy taǵaıyndaldy. Sondaı-aq, ol balabaqsha esebine negizsiz aýdarylǵan qarajatty qaıtarýǵa mindetteldi.

«Qyzylorda oblysy boıynsha ekonomıkalyq tergeý departamentiniń óndirisinde ótken jyly bıýdjet qarajatyn jymqyrý, talan-tarajǵa salý jáne maqsatsyz paıdalaný salasynda 46 qylmystyq is bolǵan. Nátıjesinde 36 istiń óndirisi aıaqtalyp, memleketke kelgen zalal kólemi 319,5 mln teńgeni qurady. Memlekettik baǵdarlamalardy oryndaý maqsatynda bólingen bıýdjet qarajatyn jymqyrýdyń ótken jyly 17 deregi anyqtalǵan. Onyń ishinde dál osy «Balapan» baǵdarlamasy boıynsha 10 qylmystyq is bar», - dep málim etti Qyzylorda oblysy boıynsha ekonomıkalyq tergeý departamentiniń baspasóz mamany Baqyt Ordanova.