Qyzylordada bala densaýlyǵyna zııan keltiretin oıynshyqtar anyqtaldy

Qyzylorda oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti osy maqsatta zerthanalyq saraptama júrgizgen bolatyn. Saraptamadan ótkizilgen 73 oıynshyqtyń 53-i eýrazııalyq ekonomıkalyq odaqqa múshe elderde shyǵarylsa, qalǵany ózge memleketterden jetkizilgen. Olardyń 13-nen sáıkessizdik anyqtaldy.

«Oıynshyqtardyń ıisi men tańbalanýy boıynsha sáıkessizdikter kezdesti. Sondaı-aq, olardyń keıbirinde jas erekshelikterine baılanysty shekteý, shyǵarylǵan memleketi men quramy týraly aqparat múldem joq. Sondaı-aq memlekettik jáne orys tilderinde derekter kórsetilmegen. Al fızıkalyq-faktorlyq 2 sáıkessizdik anyqtalǵan. Naqtyraq aıtqanda, oıynshyq boıaýlarynyń silekeı men terige turaqsyzdyǵy anyqtalǵan. Bul óz kezeginde balanyń densaýlyǵyna zııan keltiredi. Ádette, oıynshyqtardyń qaýipsizdigin tekserý eki kezeńde júrgiziledi. Máselen, ol qujattyq jáne táýekelderdi baǵalaýdy tekserý arqyly júzege asyrylady. Qujattyq tekserý kezinde tutynýshyǵa arnalǵan aqparat dáıektiliginiń zańnyń, tehnıkalyq reglamentterdiń talaptaryna sáıkestigi, jalpy qujattarynyń bolýy nazarǵa alynady», - dep málim etti Qyzylorda oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz hatshysy Aıman Janahaeva.

Onyń aıtýynsha, departament mamandary mektepke deıingi tárbıeleý mekemelerinde oıynshyqtardyń qaýipsizdigin rastaıtyn qujattar boıynsha 244 tekserý júrgizdi. Nátıjesinde tıisti talaptardy saqtaýǵa selsoq qaraǵan mamandarǵa ákimshilik shara kórildi.

Eske sala ketsek, buǵan deıin Qyzylordada kúıdirgi aýrýynyń 60 oshaǵy bar ekeni habarlanǵan bolatyn.