Qyzylordada bala asyrap alýshylarǵa qoldaý ortalyǵy jumys isteı bastady
QYZYLORDA. QazAqparat - Qyzylordada sońǵy eki jylda bala asyrap alýǵa nıet bildirgen azamattar sany azaıǵan, dep habarlaıdy QazAqparat tilshisi.
Bıylǵy jyldyń basynan beri jergilikti otbasylar 2 balany baýyryna basqan. Ol 2016-2017 jyldarmen salystyrǵanda birshama tómen bolyp otyr.
«Bas tartý aryzy men tastandy balalar týraly málimet 3 kún ishinde respýblıkalyq derekter qoryna júktelip otyrady. Qazirgi tańda sábıler úıinde 50 bala tárbıelenedi. Bul úı negizinde 60 balaǵa arnalǵan. Sondaı-aq, 1 bala patronattyq tárbıege berilse, 1 bala ınternat úıine ornalastyryldy», - dedi Qyzylorda qalalyq AHAT bóliminiń bas mamany Ásııa Jortbasova.
Qazirgi tańda Qyzylordada osy baǵytta «Januıa» atty bala asyrap alýǵa qoldaý kórsetý ortalyǵy jumys jasaı bastady. Ortalyq eki jyldan beri kóptegen túıtkildi máselelerdi sheshýge atsalysty. Ortalyq mamandary balany baýyryna basýǵa nıettengen ata-analarǵa qoldaý kórsetedi.
«Ortalyqta bala asyrap alýdyń negizgi qaǵıdattary, pedagogıkalyq-psıhologııalyq jáne áleýmettik turǵyda beıimdeý sabaqtary júrgiziledi. Bul jerde balanyń emotsıonaldyq kóńil-kúıi, qarym-qatynasy, ata-anamen úılesimdiligi men baılanysy jan-jaqty talqylanyp otyrady», - dedi «Januıa» bala asyrap alýǵa qoldaý kórsetý ortalyǵynyń mamany Zarına Beısekova.
Qazirgi kúnderi ortalyq qyzmetine 50-den astam ata-ana júgingen. Olardyń arasynan 20-sy balany asyrap alýǵa ázirligin júrgize bastady.
