Qyzylordada Azııa oıyndarynyń jeńimpazy men júldegerlerine qoshemet kórsetý rásimi boldy
QYZYLORDA. 14 jeltoqsan. QazAqparat /Jańagúl Serdaly/ - Keshe Qyzylordadaǵy «Eýrazııa» sport kesheninde jaqynda ǵana Qytaıdyń Gýanchjoý qalasynda ótken XVI Azııa oıyndarynda jeńimpaz jáne júldeger atanyp oralǵan oblys sportshylaryn marapattaý rásimi boldy.
Saltanatty sharany oblys ákimi Bolatbek Qýandyqov ashyp, elimizdiń namysyn abyroımen qorǵaı bilgen jerlesterin aıtýly jeńisterimen quttyqtady.
Osy baıraqty básekede qyzylordalyq sportshylar Qazaqstan quramasynyń qorjynyna 1 altyn jáne 2 qola medal qosty. Atap aıtqanda, Beıjiń Olımpıadasanyń jeńimpazy, álemniń eki dúrkin chempıony aýyr atlet Ilıa Ilın altyn medaldy qanjyǵyǵa baılasa, kelesi aýyr atlet Dáýren Sháýteev pen dzıýdoshy Ǵalııa Ólmentaeva qola medalǵa qol jetkizdi.
- Qurmetti sportsúıer qaýym, Syr sportynyń maqtanyshtary, - dedi saltanatty sharada oblys ákimi. - Ótken aıda Aspan asty elinde ótken básireli básekede Qazaqstan quramasy joǵary jetistikterge qol jetkizgeni barshaǵa málim. Onyń ishinde bizdiń óńirden qatysqan sportshylarymyz bıik tuǵyrlardy baǵyndyra bildi. Árıne, bul siz ben biz úshin úlken maqtanysh. Sońǵy jyldary Syr sportynda úlken serpilis bar. Bul úkimet tarapynan buqaralyq sportty damytýǵa úlken betburys jasaýynyń aıqyn jemisi. Óńirde salany órkendetýde tolaǵaı jumystar jasalýda. Atap aıtsaq, bıyl aımaqta kóptegen sport alańdary paıdalanýǵa berilse, keler jyly taǵy birqatar sport keshenderi iske qosylady. Buǵan qosa, qaladaǵy Ǵ.Muratbaev jáne «Lokomotıv» stadıondary jóndeýden ótkizilip, Aral aýdanyndaǵy sporttyq-saýyqtyrý kesheni paıdalanýǵa berildi. Jyldan-jylǵa aımaqta aýyr atletıka, dzıýdo, boks, kógaldaǵy hokkeımen qatar gandbol sekildi sport túri qaryshtap damyp keledi. Sondaı-aq aldaǵy naýqanda premer-lıgaǵa qatysatyn «Qaısar» fýtbol klýbynyń jańarǵan sport kesheninde jaqsy oıyn órnegin kórsetetinine bek senimdimiz. Endigi kezekte sańlaqtarymyzdyń álem elderi kóz tikken elimizdiń bas qalalary Almaty men Astanada ótetin qysqy Azıada jáne Londonda bolatyn Olımpıada oıyndarynda kók týymyzdy bıikte ustap, búgingideı jetistikterimen oralýyna tilektespiz.
Sóziniń sońynda oblys ákimi oblys týyn kókke kótergen sportshylar men jattyqtyrýshylardy marapattady. Rásimde Ilıa Ilınge 1,5 mln., qola júldegerge 450 myń teńgeden sertıfıkat tabys etti. Oblys aýyr atletıkasyn órkendetýge úzdiksiz úles qosyp júrgen QR eńbek sińirgen jattyqtyrýshysy Vılorıı Pak 750 myń, dzıýdodan QR eńbek sińirgen jattyqtyrýshy Ishanbek Jumabaev pen aýyr atletıka bapkeri, QR sport sheberi Evgenıı Pıa 300 myń teńgeden syıaqy aldy.
Sońynan sport sańlaqtary ózderine jasalyp jatqan qurmet pen qamqorlyq úshin alǵys sezimin jetkizdi.
