Qyzylordada Azamattyq forým ótti
ASTANA. QazAqparat - 11 qazanda Qyzylordada «Táýelsizdik jáne azamattyq qoǵam: áleýmettik jańǵyrý» taqyrybynda VII Azamattyq forým ótti, dep habarlaıdy QazAqparat.
Forýmdy asha otyryp, Qyzylorda oblysynyń ákimi Qyrymbek Kósherbaev aımaqta úkimettik emes uıymdar densaýlyq saqtaý, bilim, mádenıet jáne sport salasyn damytýǵa, áleýmettik qoldaýǵa baǵyttalǵan kóptegen jobany júzege asyryp jatqandyǵyn atap ótti.
«Elbasy atap ótkendeı, biz EDYU (OESR) standarttaryna saı keletin álemniń eń damyǵan 30 eliniń quramyna kirýdi maqsat etip jatyrmyz. Bul neni bildiredi? Sarapshylardyń pikiri boıynsha, bul elderde bolashaqta jumys oryndarynyń 47 paıyzy avtomattandyrylǵan bolýy kerek. Bul turǵyndardyń 50 paıyzynyń óz-ózin jumyspen qamtýyna alyp keledi. Bul - jańa 21 ǵasyrdyń talaby! Bizge bilim-ǵylym, zamanǵa ıkemdi ári adamgershilik qasıetteri joǵary azamattar kerek. Sondyqtan, mysalǵa, mektep qabyrǵasynan-aq balalardy aqparatpen jumys isteýge úıretip, olardy ómir talaptaryna sáıkes qalyptastyra otyryp, bolashaq patrıot, ultjandy azamattardy tárbıeleýimiz kerek,- dedi oblys ákimi.
Sondaı-aq aımaq basshysy forýmnyń qurmetti qonaqtary - Qyzylorda oblysy Azamattyq Alıansy qaýymdastyǵynyń burynǵy tóraıymdary Darıǵa Aqmaǵambetova men Álıma Ábdihalyqovaǵa alǵys hat tabystady, ıyqtaryna aq oramal japty.
Jıyn barysynda VII Respýblıkalyq Azamattyq forým delegattary saılandy.
