Qyzylordada áıeldi masqaralaıtyn málimetterdi jarııa etemin dep bopsalaǵan adam ustaldy

QYZYLORDA. QazAqparat - Qyzylordada áıeldi masqaralaıtyn málimetterdi jarııa etemin dep bopsalap, erkinen tys jynystyq qatynas talap etken 28 jastaǵy adam ustaldy, dep habarlaıdy QazAqparat tilshisi.

Polıtsııaǵa 22 jastaǵy azamatsha júgindi. Ol tanysynyń ózin masqaralaıtyn málimetterdi jarııa etemin dep qorqytyp, bopsalaý arqyly erkinen tys jynystyq qatynas talap etetinin aıtqan.

Atalǵan derek boıynsha Qyzylorda oblysy Polıtsııa departamentiniń Uıymdasqan qylmysqa kúres basqarmasy jáne Aral aýdandyq polıtsııa bólimi qyzmetkerleri birlesip jedel izdestirý jumystaryn júrgizdi. Nátıjesinde Qyzylorda oblysynda turatyn 28 jastaǵy turǵyn ustaldy.

«Kúdiktige qatysty QR Qylmystyq kodeksiniń 194-baby sotqa deıingi tergep-tekserý áreketteri júrgizilýde. Onda qorqytyp alýshylyq, ıaǵnı kúsh qoldaný ne bótenniń múlkin joıý nemese búldirý qaterin tóndirip, sol sııaqty jábirlenýshini nemese onyń jaqyndaryn masqaralaıtyn málimetterdi ne jarııalanýy jábirlenýshiniń nemese onyń jaqyndarynyń múddelerine eleýli zııan keltirýi múmkin ózge de málimetterdi taratý qaterin tóndirip bótenniń múlkin nemese múlikke quqyqty berýdi nemese múliktik sıpattaǵy basqa da áreketter jasaýdy talap etý jaǵdaıy kórsetilgen. Kúdikti ýaqytsha ustaý ızolıatoryna qamaldy», - dep málim etti Qyzylorda oblystyq Polıtsııa departamentinen.

Eske salsaq, budan buryn adam ólimine alyp kelgen oqıǵada áreketsizdik tanytqan polıtseıge sot úkimi shyqty.