Qyzylordada «Áıel - tirshiliktiń gúli» atty kontsert uıymdastyryldy
QYZYLORDA. QazAqparat - Nazarbaev mektebi uıymdastyrǵan kontsertke 400-ge jýyq ata-ana, mektep ustazdary men oqýshylary jáne oblysymyzǵa eńbegi sińip júrgen isker áıelder qaýymynan qonaqtar qatysty, dep habarlady QazAqparat HAA tilshisi.
Kontsertti ashqan «Qyz ǵumyry» prologynda qyz bala jolynyń jińishke ekeni, ómiriniń kóktemmen baılanysty bolatyny, qyzbaladan aq jaýlyqty áje bolǵansha tirshiligin toqtatpaı kele jatqan maǵynaly ǵumyr beınelendi.
Nazarbaev Zııatkerlik mektebiniń ónerpaz oqýshylary men ustazdarynyń uıymdastyrǵan kontserttik baǵdarlama san qıly janrdy qamtydy. Myń buralǵan bıshiler «Tańǵy shýaq», «Uıǵyr bıi», «Qytaı bıi», grýzın halqynyń ulttyq bıin naqyshyna keltire oryndasa, bulbul daýysty ónerpaz oqýshylar «Kóktem valsi» , «Qazaq qyzy», «Daft pank» atty merekelik án toptamasymen shashý shashty.
Shet elden kelgen muǵalim Ronı Rýstııanyń mektep oqýshysymen birge ult aspaptar ansambliniń súıemeldeýimen oryndaǵan «Anashym» áni kórermenderge erekshe kóńil-kúı syılady. Sheteldik áriptesimizdiń qazaq tilinde án shyrqaýyn ana tilimizge, ulttyq ónerimizge degen qurmet dep qabyldaǵan tyńdarman iltıpatpen qol soqty.
Sonymen birge óner men bilimdi qatar alyp júrgen shákirtter kontserttik baǵdarlamada ult aspaptar ansambliniń oryndaýynda «Ata tolǵaýy» kúıin usynyp, skrıpka men pıanınoda Vıvaldı shyǵarmalaryn kásibı deńgeıde oryndap shyqty. Tamyljyǵan kúıdiń sońy aqyndardyń jyr joldaryna ulasty.
Analaryna degen qurmetterin oqýshylar arnaıy óleń-jyr joldary arqyly jetkize bildi. Úshtildilik saıasaty kórinis taýyp, óleńder úsh tilde de oqyldy.
Al kontsertke kelgen ata-analar qaýymy tek kórermender retinde ǵana qatysyp qoımaı, balalarymen birge óz ónerlerin kórsetti. «Ana» ánine óz balalarymen birge vals bıledi. Ana men bala arasyndaǵy mahabbat, syılastyq, názik sezim kórermen júregine jol tapty.
Sondaı-aq, kontsertte 50-ge jýyq oqýshydan quralǵan hor «Slýshaı» áni men «Ana týraly jyrdy» erekshe tebirenispen oryndap shyqty.
Shara sońynda merekelik keshti daıyndaýǵa atsalysqan barlyq áriptesterge, ata-analarǵa, oqýshylarǵa alǵys bildirilip, kórermenderge mektep ujymynan yqylas gúli tabystaldy.
