Qyzylordada áıel adam koronavırýs juqtyrý týraly jalǵan aqparat taratqan
QYZYLORDA. QazAqparat - Qyzylordada oblys turǵynynyń koronavırýs juqtyrý oqıǵasy týraly áleýmettik jelide jalǵan aqparat taratqan 62 jastaǵy áıel ustaldy, dep habarlaıdy QazAqparat tilshisi.
Bul týraly oblystyq polıtsııa departamentiniń baspasóz qyzmeti habarlady.
Áleýmettik jeli arqyly aımaqta koronavırýs juqtyrǵandar bar dep jalǵan aqparat taratqan eki áıel qazir qamaýǵa alynǵan. Onyń biriniń jasy 62-de bolsa, ekinshisi 32-de. Kináliler óz qatesin tolyq moıyndap, ókinish bildirgen. Qylmystyq kodekstiń 274-baby, 4-tarmaǵyna sáıkes (tótenshe jaǵdaı kezinde kórineý jalǵan aqparat taratý) sotqa deıingi tergeý bastaldy.
«Tekserilmegen aqparatty taratpaý týraly kóptegen eskertýge qaramastan, polıtsııa turǵyndar arasynda alańdaýshylyq týǵyzǵan jalǵan aqparat taratqan eki adamdy anyqtady», – dedi Qyzylorda oblystyq polıtsııa departamenti.
Eske sala ketsek, Qyzylorda oblystyq prokýratýrasy óńirde COVID-19 ınfektsııasynan emdelip jatqan tulǵalar bar ekendigi týraly aqparatttyń shyndyqqa janaspaıtynyn málimdegen edi.
