Qyzylordada aıdaýyl qyzmetine 8 avtokólik berildi
QYZYLORDA.QazAqparat-Tártip saqshylarynyń qylmystar men quqyq buzýshylyqtardyń aldyn alyp, qoǵamdyq tártipti nyǵaıtyp jáne jedel is-áreketterdi júzege asyrý úshin bes qarýynyń saı bolýy asa mańyzdy. Qazirgi tańda oblystaǵy tynyshtyq pen tártipti saqtap otyrǵan ishki ister organdarynyń materıaldyq-tehnıkalyq bazasyn nyǵaıtýda oblys ákimdigi tarapynan jan-jaqty jaǵdaı jasalyp, qoldaý kórsetilip keledi. Bul týraly QazAqparat tilshisi habarlady.
Sonyń bir aıǵaǵy retinde Oblystyq Іshki ister departamentiniń teńgerimine taǵy da 8 avtokólik berildi. Qajetti tehnıkalyq quraldarmen jaraqtandyrylǵan Gaz-2705 markaly avtokólikter kúdiktiler men aıyptalýshylardy tasymaldaýǵa arnalǵan. Avtokólikter aıdaýyldaý qyzmet salasyna paıdalanýǵa berilmek. Bul atalǵan bólinis qyzmetiniń jedeldigin arttyryp, jumys sapasyn jaqsartýǵa septigin tıgizedi.
Osyǵan sáıkes, 04 tamyzda Jergilikti polıtsııa qyzmetiniń alańynda atalǵan avtokólikterdiń kilti saltanatty túrde tabystalyp, sharaǵa departament basshylyǵy men jeke quram qatysty.
Saltanatty shara barysynda Qyzylorda oblysynyń ishki ister departamenti bastyǵynyń orynbasary J.Ospanov sóz alyp: «Memleket basshysy N.Á.Nazarbaevtyń tapsyrmasyna sáıkes, óńirimizde materıaldyq-tehnıkalyq bazany nyǵaıtý, ishki ister organdary qyzmetkerlerin áleýmettik qorǵaýdy jaqsartý jumystary josparly júrgizilip keledi. Bıyldyń ózinde qoldaýdyń nátıjesinde 69 «Toyota Corolla» markaly avtokólik, esirtki qylmystarymen kúres bólinisterine 5 jáne Jergilikti polıtsııa qyzmetine 11 avtokólik berilgen bolatyn», - dedi.
