Qyzylordada aıaldamadaǵy jol apaty: Aýrýhanadaǵy eki adamnyń jaǵdaıy aýyr
Bul jóninde Qyzylorda oblystyq Densaýlyq saqtaý basqarmasynyń bas mamany Aıbek Myrzaǵulov málim etti. Onyń aıtýynsha, oqıǵa ornynda 3 jedel járdem brıgadasy qyzmet etken.
«Oqıǵa ornynan 2 adam jedel járdem brıgadasymen aýrýhanaǵa jetkizildi. Dárigerler 10 jas shamasyndaǵy balany oblystyq balalar aýrýhanasynyń jansaqtaý bólimine jatqyzdy. Al 31 jastaǵy áıel qalalyq aýrýhananyń jansaqtaý bólimine jatqyzyldy. Ekeýiniń de jaǵdaıy óte aýyr. Olarǵa protsedýralardyń barlyǵy júrgizilip jatyr», - dedi Aıbek Myrzaǵulov.
Esterińizge sala ketelik, jol apaty búgin saǵat 09.15 shamasynda Nazarbaev dańǵyly boıynda bolǵan. «Toıota Kamrı» markaly avtokóligi «Mercedes-Benz» kóligin sol qaptalynan kelip soqqan. Saldarynan «Toıota Kamrı» júrgizýshisi kólikti basqara almaı, avtobýs aıaldamasynda turǵan adamdardy basyp ketken.
«Úsh adam oqıǵa ornynda kóz jumyp, 2 adam emhanaǵa jetkizildi. Kináli avtokóliktiń júrgizýshisi oqıǵa ornynda anyqtalyp, ýaqytsha ustaý ortalyǵyna qamaldy. Saraptamalar taǵaıyndaldy. Atalǵan derek boıynsha QR Qylmystyq kodeksiniń 345-babynyń 4-bóligimen sotqa deıingi tergep-tekserý jumystary júrgizilýde», - dedi oblystyq polıtsııa departamentiniń baspasóz qyzmeti.