Qyzylordada avtokólikti teris qaraı júrgizgen 18 jastaǵy jigit jazalandy
QYZYLORDA. QazAqparat - Qyzylordada avtokólikti keri baǵytta jolmen júrgizip, jol qozǵalysy erejesin óreskel buzǵan 18 jastaǵy azamat tıisti jazaǵa tartyldy, dep habarlaıdy QazAqparat tilshisi.
Áleýmettik jelide Qyzylorda qalasynyń kóshelerinde shekten shyqqan tártipsiz áreketi beınelengen belgisiz bireýdiń beınetúsirilimi keńinen taraǵan edi. Bul jaǵdaı jergilikti tártip saqshylarynyń nazarynan tys qalǵan joq.
Qyzylorda oblystyq polıtsııa departamentiniń habarlaýynsha, beınejazba boıynsha jedel-izdestirý jumystary júrgizilgen. Sol arqyly Qyzylorda qalasynyń polıtsııa basqarmasy jol-patrýldik polıtsııa batalonynyń qyzmetkerleri «VAZ-21099» markaly avtokóliginiń 18 jastaǵy júrgizýshisiniń jeke basyn anyqtap, ony jaýapkershilikke tartty.
Zańsyz is-áreketi úshin oǵan qatysty QR Ákimshilik quqyq buzý kodeksiniń 596-baby 5-bóligimen, 602-babynyń 1-bóligimen, 612-baby 2-bóligimen ákimshilik hattama toltyrylǵan. Avtokólik aıyp alańyna qoıyldy.
«Qyzylorda oblysy polıtsııa departamenti tarapynan áleýmettik jelilerge turaqty túrde monıtorıng júrgiziledi. Anyqtalǵan zańbuzýshylyq boıynsha birden shara qabyldanýda. Sondyqtan júrgizýshilerden jol qozǵalysy erejesin, jol belgileriniń nusqamasyn qatań saqtaýdy suraımyz. Sondaı-aq, kólik quraldarynyń turaqqa qoıylýy men toqtaýy, paıdalaný erejesin jaýapkershilikpen múltiksiz oryndaýy qajettigin eskertemiz», - deıdi departament bastyǵy, polıtsııa polkovnıgi Sultan Bektóre.
Eske sala keteıik, buǵan deıin Qyzylordada munaı ónimderin zańsyz óńdep satqan kásipker sottalǵan bolatyn.
