Qyzylordada avtokólikpen muz astyna túsip ketken 4 adamnyń múrdesi tabyldy
NUR-SULTAN. QazAqparat - Qyzylorda oblysynda avtokólikpen muz astyna túsip ketken 4 adamnyń múrdesi tabyldy. Bul týraly QR Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat tilshisi.
«2020 jyldyń 8 jeltoqsanynda Qyzylorda oblysynyń Aral aýdanynda, Qamystybas aýylynan 35 shaqyrym jerde Qambash kólinde «ÝAZ» markaly avtokólik muz astyna túsip ketti. Avtokólik salonynda 7 adam bolǵan. Onyń 3-eýi kólikten ózderi shyǵyp úlgergen. Qutqarýshylar sýǵa batyp ketken 1985, 1981, 1994, 1973 jyldary dúnıege kelgen 4 adamdy izdestirdi. Biraq túnde izdestirý jumystary toqtatyldy», - dedi ol.
Onyń aıtýynsha, búgin tańerteń izdeý jumystary jalǵastyrylǵan.
«7 metr tereńdikte (muzdyń qalyńdyǵy 25 sm) ÝAZ avtokóligi tabyldy. Avtokóliktiń ishinde qaıtys bolǵan adamdardyń múrdeleri boldy. Saǵat 10.05-te qutqarýshylar qaza bolǵan 4 adamnyń máıitin polıtsııa qyzmetkerlerine tapsyrdy», - dedi Talǵat Ýálı.
Resmı ókildiń dereginshe, izdestirý jumystaryna Qyzylorda oblysy Tótenshe jaǵdaılar, polıtsııa departamentiniń, jergilikti atqarýshy organdardyń kúshteri men quraldary jáne týystary (27 adam, 7 birlik tehnıka) jumyldyrylǵan.
