Qyzylordada avtokólik qaqqan adam oqıǵa ornynda kóz jumdy
QYZYLORDA. QazAqparat - Qyzylorda qalasyndaǵy Táýelsizdik dańǵyly men Sh.Esenov kósheleriniń qıylysynda avtokólik qaqqan jaıaý júrginshi oqıǵa ornynda kóz jumdy, dep habarlaıdy QazAqparat tilshisi.
Adam qaqqan avtokólik júrgizýshisi oqıǵa ornynan boı tasalap ketken. Polıtsııa qyzmetkerleri kináli tulǵany anyqtaý maqsatynda júrgizilgen jedel-izdestirý jumystaryn júrgizdi. Nátıjesinde izin sýytpaı avtokólik júrgizýshisi qolǵa tústi.
«Atalǵan derek boıynsha QR Qylmystyq kodeksiniń 345-baby 3-bóligimen jáne 347-babymen sotqa deıingi tergep-tekserý jumystary júrgizilýde. Onda kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy jáne jol-kólik oqıǵasy bolǵan jerden ketip qalý jaǵdaılary kórsetilgen», - dep málim etti Qyzylorda oblystyq polıtsııa departamentiniń baspasóz qyzmeti.
Qazirgi tańda kúdikti júrgizýshi ustaldy. Ol Qyzylorda qalalyq polıtsııa basqarmasynyń ýaqytsha ustaý abaqtysyna qamaqqa alyndy. Tıisti saraptamalar taǵaıyndalyp, oqıǵanyń mən-jaılary anyqtalýda.
Qyzylorda oblystyq polıtsııa departamentiniń baspasóz qyzmeti Qazaqstan Respýblıkasy Qylmystyq-protsestik kodeksiniń 201-babynyń talaptaryna sáıkes, sotqa deıingi tergep-tekserýdiń basqa derekteri jarııa etýge jatpaıtynyn málim etti.
Budan buryn Qyzylordada júk kóligi qaqqan taǵy bir adam oqıǵa ornynda ajal qushqan bolatyn.
