Qyzylordada «Avtobýs parki» ashyldy
QYZYLORDA.QazAqparat-Qyzylorda qalasynda jańa úlgidegi avtobýs parki ashyldy. Oǵan Qyzylorda oblysynyń ákimi Qyrymbek Kósherbaev qatysyp, qyzylordalyqtardy qýanyshymen quttyqtady, dep habarlady QazAqparat tilshisi.
«Bul avtoparktiń ereksheligi - qala kóleminde qyzmet kórsetetin úlken syıymdalyqtaǵy avtobýstarǵa arnalǵan turaqtar, janarmaı beketi, kólik jýý alańy men avtobýstardyń úzdiksiz jumys jasaýyna jaǵdaı jasaıtyn túrli múmkindikter qarastyrylǵan»,- dedi oblys ákimi.
Jańa avtobýstardyń tehnıkalyq jáne sanıtarlyq jaǵdaıy eldiń suranysyna saı bolý úshin, oblystyq bıýdjetten 2 mlrd. teńgeden astam qarjy qarastyrylǵan. Avtobýs parkiniń jalpy aýmaǵy 5 gektardy quraıdy jáne 200 avtobýsqa shaqtalǵan. Aldaǵy ýaqytta, avtobýs parki 250-300 adamdy jumyspen qamtıtyn bolady.
