Qyzylordada aýyz sý qubyrlarynyń 30 paıyzy ábden tozyǵy jetken
Qyzylorda oblystyq energetıka jáne turǵyn-úı kommýnaldyq sharýashylyq basqarmasy basshysynyń orynbasary Erlan Jolamanovtyń aıtýynsha, qazirgi tańda qalada eski qubyrdyń 20-dan astam jerinde jaryq paıda bolǵan. 1968 jyly paıdalanýǵa berilgen aýmaqtardaǵy qubyrlar joǵary qysymdy kótere almaıdy.
«Búgingi kúnge deıin qalaishilik sý qubyrynyń 60 paıyzdan astamy tolyq jańartylǵan. Sondaı-aq, Qyzyljarma jer asty sý keni arqyly 98 sý uńǵymalary iske qosylǵan. Osylaısha bul aımaqtar jer asty sýyna kóshirilgen. Bıyl taǵy da 10 paıyzǵa jýyǵy jańartylyp jatyr. Aldaǵy ýaqytta qalǵan 30 paıyzy jańartýdy qajet etedi. Búgingi tańda aýyz júıesiniń tolyq qarqynmen jumys jasaýyna tozyǵy jetken qubyrlar birshama kedergi keltiredi», - dedi E.Jolamanov.
Sońǵy jyldary bul baǵytta aýqymdy jumystar qolǵa alynyp keledi. Mamandar jyldar boıyna qordalanǵan problemalardy bir sátte sheship tastaý múmkin emestigin aıtady.
Esterińizge sala ketelik, Qyzylorda qalasyndaǵy Araı-2 jáne Syrdarııa móltek aýdandarynda 15-16 qarasha kúnderi aýyz sý ýaqytsha toqtatyldy. Ol oblys ortalyǵyndaǵy Jibek joly jáne Músiráli Ájiqoja kósheleri qıylysynda ornalasqan eski aýyz sý júıesindegi aqaý saldarynan oryn alǵan.
«Bul jaǵdaı aıaq asty oryn alǵan apatty jedel qalpyna keltirý maqsatynda amalsyzdan týyndady. Atalmysh aqaý qalanyń basqa aýdandaryna eshbir áserin tıgizgen joq. Ol aýmaqtarda aýyz sý qalypty deńgeıde jetkizildi. Atalmysh apatty jedel sheshý maqsatynda kommýnaldyq qyzmetten 30 adam men 20 tehnıka táýlik boıy kúsheıtilgen rejimde jumys istedi. Negizi, sol aýmaqta bıyl jańa sý qubyrlary júrgizilgen. Ony taıaý kúnderi iske qosý josparlanǵan. Búginde mamandar sol jumystardy merziminen buryn bastap aqaý bolǵan eski qubyr júıesin jańasyna qosýǵa jumys jasaýda», - dedi «Qyzylorda sý júıesi» MKK dırektory Tileýbergen Qanybetov.
