Qyzylordada aýyl túlekterine arnalǵan bilim granttary 2 esege artty
QYZYLORDA. QazAqparat - Qyzylorda oblysynda aýyl túlekterine arnalǵan bilim berý granttary 2 esege artty, dep habarlaıdy QazAqparat tilshisi.
Bul derekter oblys ákimi Qyrymbek Kósherbaevtyń qatysýymen ótken májilis barysynda aıtyldy. Jyl saıyn aımaqta kópbalaly otbasylardan shyqqan talapty aýyl jastary úshin ákimniń bilim berý granttary bólinip keledi. Bıyl bilim granttarynyń sany 200-ge jetip otyr. Sonymen qatar, Memleket basshysynyń tapsyrmasyna sáıkes Syr óńirinde kásiptik mamandyqtarǵa 500 grant bólindi.
Memleket basshysynyń Qazaqstan halqyna arnaǵan Joldaýy aıasynda 2019 jyl «Jastar jyly» bolyp jarııalanǵanyn atap ótken aımaq basshysy «Jastar arasynda qalyptasqan áleýmettik problemalardy sheshý, tabysty, básekege qabiletti jáne ultjandy jas qazaqstandyqtardy qalyptastyrý - aǵa býynnyń mindeti. Osy maqsatta Qyzylorda oblysynyń memlekettik jastar saıasatyn damytýdyń 2021 jylǵa deıingi Jol kartasy bekitilip, onda jumysqa ornalasý, turǵyn úı, bilim alý, bos ýaqytyn tıimdi ótkizý sııaqty taǵy basqa jastardyń ózekti máseleleri qarastyrylǵan. Jyl saıyn 100 daryndy da talapty aýyl balalary, onyń ishinde, az qamtylǵan jáne kópbalaly otbasynan shyqqan jastar elimizdiń beldi joǵary oqý oryndarynda oblys ákiminiń grantymen bilim alýda. Bıyl biz mundaı granttardyń sanyn eki esege ósirip, 200-ge jetkizdik»,-dedi.
Esterińizge sala keteıik, 2014 jyldan bastap Máskeý men Sankt-Peterbýrgtiń ozyq oqý oryndarynda 452 qyzylordalyq stýdent Reseı federatsııasy úkimetiniń granty esebinen bilim alýda. Osy jyly alǵashqy 74 túlek oqýyn támamdady, olardyń 43-i magıstratýrada oqýlaryn jalǵastyrady, qalǵandary oblystyń iri kásiporyndaryna - «SKZ-Ý» JShS, «Qyzylorda jaryǵy» JShS, «Ansar Servıs» JShS, «Teplotehnık» JShS, mamandandyrylǵan memlekettik mekemelerge - ındýstrıaldy-ınnovatsııalyq damý, energetıka jáne turǵyn úı-kommýnaldyq sharýashylyq basqarmalary men jastar resýrstyq ortalyǵyna jáne t.b. jumysqa ornalastyryldy. Aıta keteıik, kelesi jyly taǵy 150 túlek oqýyn bitiredi dep kútilýde.
Jalpy, jastarmen barlyq baǵyttar boıynsha jumys júrgizilýde.
Aıta ketý kerek, Qyzylorda oblysy respýblıkada alǵashqylardyń biri bolyp «NEET kategorııasyndaǵy jastarmen jumys jasaýdyń kezeńdik jospary» men «2021 jylǵa deıingi memlekettik jastar saıasatyn damytýdyń jol kartasyn» qabyldady. Atalmysh qujattar sheńberinde qoǵamdyq ómirdiń túrli salalarynda jobalar júzege asyrylýda.
Ótken jyldan bastap qyzylordalyq jastar resýrstyq ortalyǵy eýropalyq jumys úlgisine kóshti. Onyń sheńberinde ortalyqta qyz-jigitterge qajetti barlyq qyzmet túrleri: kovorkıng ortalyǵy, jattyǵý zaly, til úıretý kýrstary, ınternet qyzmetteri, zańgerlerdiń, dárigerler men basqa da mamandardyń keńes berýi, kınozal jáne t.b. usynylady. Kelesi jyly Syrdarııanyń sol jaǵalaýynda jańa jastar resýrstyq ortalyǵy paıdalanýǵa beriledi.
Qazirgi tańda aımaqtaǵy halyqtyń 24%-y jastar, olardyń ishinde 190 myńnan astamy 14-29 jas aralyǵynda, al ekonomıkalyq turǵydan belsendileri - 110 myńnan astam. Aıta keteıik, aımaq turǵyndarynyń jalpy sany 700 myńnan astam adamdy quraıdy.
Oblystyq jastar saıasaty basqarmasynyń basshysy Qýanysh Januzaqov aımaqtaǵy jastardy qoldaý jónindegi sharalardy júzege asyrý barysy jaıly baıandady.
«Bilim jáne ǵylym mınıstrligi men Dúnıejúzilik banktiń birlesken «ZhasProject» jobasynyń aıasynda Qyzylorda oblysynda 266 joba qoldaý taýyp, 900-ge jýyq qyz-jigit jumysqa ornalasty», - dedi Qýanysh Januzaqov.
Osyǵan deıin Qyzylorda oblysynda jumyssyzdyq úsh esege deıin azaıǵandyǵy habarlandy.
