Qyzylordada aýyl balalarynyń respýblıkalyq jarysy ótti
QYZYLORDA. QazAqparat - Qyzylorda qalasynda aýyl jasóspirimderiniń respýblıkalyq jazǵy sport oıyndary máresine jetti, dep habarlaıdy QazAqparat tilshisi.
Atalmysh sport oıyndary tórt jylda bir márte ótkiziledi. Bıyl ekinshi márte uıymdastyryldy. Oǵan elimizdiń barlyq óńirinen komandalar keldi. Oıyndar barysynda 2001-2003 jyldarda dúnıege kelgen jasóspirimder synǵa tústi. Elimizdiń barlyq óńirinen kelgen órender sporttyń voleıbol, shaǵyn fýtbol, qazaq kúresi, toǵyzqumalaq, erkin kúres, asyq atý, grek-rım kúresi, dzıýdo, taekvondo, gandbol sekildi túrlerinen sheberlik baıqasty.
Aýyl jasóspirimderiniń jazǵy sport oıyndaryna uıymdastyrýǵa QR Mádenıet jáne sport mınıstrligi Sport jáne dene shynyqtyrý isteri komıteti, Qyzylorda oblysynyń ákimdigi qoldaý kórsetti.
Jalpy komandalyq esepte Qyzylorda oblysynyń komandasy kósh bastady. Al úzdik úshtikti Túrkistan jáne Almaty oblystary túıindedi. Syr óńiriniń sańlaqtary voleıboldan jigitter arasynda, shaǵyn fýtbol, gandbol (qyzdar), qazaq kúresi, grek-rım kúresi, dzıýdodan jeńimpaz boldy. Túrkistan oblysynyń órenderi toǵyzqumalaq, erkin kúres, taekvondodan top jarsa, voleıboldan qyzdar arasynda Almaty oblysynyń sportshylary jeńis tuǵyrynan kórindi.
