Qyzylordada aýyl áıelderi forýmy ótti
QYZYLORDA. QazAqparat - Qyzylordada aýyl áıelderi forýmy. Oǵan Batyr analar, túrli salada jemisti qyzmet jasap júrgen názik jandar, memlekettik qyzmetkerler, úkimettik emes uıym ókilderi qatysty, dep habarlaıdy QazAqparat tilshisi.
«Syr óńiriniń damýyna áıel kisilerdiń qosqan úlesi zor. Sondyqtan búgingi sharanyń mańyzy erekshe dep sanaımyn. Aýyldy damytýda da áıel kisiler belsendilik tanytyp keledi», - dedi forýmnyń ashylý saltanatynda oblys ákiminiń orynbasary Rýslan Rústemov.
Forým barysynda qoǵamnyń órkendeýine zor úles qosqan 35 áıel kisi ár sala boıynsha úzdik dep tanyldy. Olardyń qatarynda bilim, medıtsına, poshta nemese óndiris qyzmetkeri, fermerlik jáne sharýa qojalyǵynyń basshysy, saýda jáne qyzmet kórsetý salasyndaǵy shaǵyn jáne orta bıznes basshysy bar. Olarǵa Qyzylorda oblysy ákiminiń atynan arnaıy dıplom tabys etilip, syı-sııapat kórsetildi. Sondaı-aq, Sotsıalıstik Eńbek eri, Batyr ana Sálıma Jumabekovaǵa «Ǵasyr ana» nomınatsııasy tabys etildi.
Forým barysynda Jańaqorǵan aýdany, Keıdena aýyldyq okrýgine qarasty Aqqum aýylynda turatyn ekinshi top múgedegi Qasıet Oral óziniń kásibin qalaı bastaǵanyn baıandap berdi.
Kaltsıı jetispeýshiligi saldarynan kishkentaıynan súıegi synatyn syrqatqa ushyraǵan ol qazir qolóner buıymdaryn jasaýmen aınalysady. Qazirgi tańda ol tiginshilik kýrsqa qatysyp, bilimin jetildirip keledi. Qasıet Oral bıylǵy jyldyń tamyz aıynda ótkizilgen múmkindigi shekteýli kásipkerler ónimderiniń baıqaýynda jeńimpaz atanyp, oblys ákiminiń alǵys haty men 1 mln teńgege qol jetkizgen edi.
Budan buryn biz Qyzylordada múmkindigi shekteýli jandarǵa arnalǵan «Armansyz kúnim bolmaıdy» atty merekelik shara ótkenin habarlaǵan edik.
