Qyzylordada aýtızm taqyrybynda mamandarǵa keńes berildi
«Asyl mıras» jeke qaıyrymdylyq qory aýtızmi bar balalarǵa arnalǵan ortalyqty elimizdiń alty qalasynan ashqan bolatyn. Solardyń biri Qyzylorda qalasynda jumys jasap keledi. Aýtızm ortalyǵynyń jetekshisi Bolatbek Aıtbenbetov búginge deıin munda 500-den astam otbasy qyzmet alǵanyn jetkizdi.
«Bizde barlyq balalarǵa tegin qyzmet kórsetiledi. Jalpy, balalar aýtızmi psıhologııalyq damýdyń buzylýy bolyp tabylady. Mundaı órender adamdarmen qatynasta birqatar qıyndyq kórýi ábden múmkin. Aıta keterligi, elimizde aýtızmge shaldyqqan balalardyń sany naqty qansha ekenin tolyq eshim aıta almaıdy. Onyń birshama sebebi bar. Elimizde mundaı máselede dıagnozda dál anyqtaı alatyn mamandar sany óte az», - dedi Bolatbek Aıtbenbetov.
Onyń aıtýynsha, ortalyqqa oblys aýdandarymen birge basqa óńirlerden de balalar kelip jatady. Olar úsh aılyq kýrstan ótkiziledi. Odan keıin úı jaǵdaıynda jumys isteıtin jospar beriledi. Nátıjesinde aptasyna bir márte, juma kúni sýpervızııa uıymdastyrylyp jáne ata-ana saǵaty ótkiziledi.
Qyzylorda qalasyndaǵy «Asyl mıras» aýtızm ortalyǵynda búgingi ataýly kúnge oraı birqatar sharalar ótkizildi. Solardyń biri - tıisti sala mamandaryna arnalǵan ashyq esik kúni. Oǵan obllystaǵy defektolog, psıholog, medıtsına salasynyń mamandary, nevrepatolog sekildi mamandyq ıeleri qatysty.
«Búgingi shara barysynda aýtızmge shaldyqqan balalarmen júrgiziletin jumys túrleri, ata-analarmen keńes, jeke jáne toptyq jumys júrgizý máseleleri talqylandy. Bul mamandardyń biliktiligin jetildirýde oń áserin tıgizedi degen oıdamyz», - dedi pedagogıka ǵylymdarynyń kandıdaty, professor Sara Jánibekova.
Sondaı-aq, búgingi kúni Qyzylorda oblysynda aýtızmge shaldyqqan balalardyń qatysýymen sporttyq jáne merekelik sharalar uıymdastyryld y. Kitaphanalarda «Aýtızm týraly ne bilesiz?» taqyrybynda kitap kórmesi bolyp ótti.
