Qyzylordada aýmaǵy 292 sharshy metr bolatyn jazǵy kafe órtendi
QYZYLORDA. QazAqparat - Qyzylorda qalasynda kafeniń jazdyq alańy órtenip ketti. Onyń jalpy aýmaǵy 292 sharshy metrdi quraıdy, dep habarlaıdy QazAqparat tilshisi.
Oqıǵa 28 maýsymda saǵat 15:00 shamasynda boldy. Oblys ortalyǵyndaǵy Á. Bókeıhanov kóshesinde ornalasqan «Tamsan» kafesiniń aýdany 292 sharshy metrlik jazǵy alańy janǵan.
«Órt 15:31-de oqshaýlanǵan, 15:50-de tolyǵymen óshirilgen. Tilsiz jaýdan qaza tapqandar men zardap shekkender joq. Órttiń sebebi men shyǵyny anyqtalýda», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Eske salsaq, budan buryn Qyzylordada 425 sharshy metrdi quraıtyn karaoke klýby órtenip ketti.
