Qyzylordada aýdarylyp qalǵan júk kóligindegi janarmaı turǵyn úılerge qaýip tóndirdi
QYZYLORDA. QazAqparat - Qyzylorda qalasynda 19 tonna dızeldik janarmaı alyp kele jatqan júk kóliginiń tirkemesi aýdarylyp qaldy. Saldarynan 4 tonnasy tógilip, sol aýmaqtaǵy turǵyn úılerge órt qaýpin týyndatty, dep habarlaıdy QazAqparat tilshisi.
Oqıǵa oblys ortalyǵyndaǵy Beıbitshilik kóshesi boıynda boldy.
Sol aýmaqta jergilikti seriktestiktiń birine tirkelgen «KaMAZ» júk kóligi aýdarylyp qalǵan.
Bul jóninde tótenshe jaǵdaılar salasyna habar túskennen keıin oqıǵa ornyna Órt sóndirý kyzmetiniń № 5 órt sóndirý bóliminiń qyzmetkerleri jumyldyrylǵan.
«Barlaý jumysynyń nátıjesinde júk kóliginiń júrgizýshici baskarý júıesine ıe bola almaı qalǵany anyqtaldy. Saldarynan júk kóliginiń tirkemesindegi 19 tonna dızeldiń 4 tonnasy jerge tógilgen. Tógilgen qatty janǵysh suıyqtyqtyń ústi qummen jabyldy. Órtke ulasý qaýpi joǵary bolǵandyqtan jaqyn úılerdegi turǵyndar kayipciz orynǵa shyǵaryldy. Oǵan qosa órt sóndirý tehnıkasy ony aýyzdyqtaýǵa daıyn turdy», - deıdi Qyzylorda oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Bul jóninde qalalyq polıtsııa basqarmasy tómendegishe túsinikteme berdi.
«Jol-kólik oqıǵasyna baılanysty avtokólik júrgizýshisine QR Ákimshilik quqyq buzý kodeksiniń 610-baby 1-bóligimen ákimshilik hattama rásimdeldi. Adam shyǵyny oryn alǵan joq», - dedi basqarmadan.
Eske salsaq, budan buryn Qyzylordada maqta tıelgen júk kóligi órtenip ketken bolatyn.
