Qyzylordada aýa temperatýrasy 47 gradýsqa deıin kóterildi
Maýsym aıynyń sońǵy eki kúni men shilde aıynyń basynda Qyzylorda oblysynyń basym bóliginde aýa temperatýrasy 44-47 gradýsqa deıin jetti. Aýa temperatýrasy tek Aral aýdanynda ǵana 39 gradýstan asqan joq.
«Tabıǵattyń mundaı qubylysy budan buryn Qarmaqshy aýdanynda baıqaldy. 2017 jyly Qarmaqshy aýdanynda aýa temperatýrasy 46,7 gradýsty kórsetti. Odan keıingi ystyq aýa raıy keshe, 1 shilde Qyzylordada 46,6 gradýsqa jetti. Bul ystyq bizdiń óńirge Iran aýmaǵynan jetken jyly aýa massasynyń áserinen bolyp otyr. Soǵan baılanysty sońǵy úsh kúnde jaýyn-shashynsyz aýa raıy baıqaldy. Synap baǵanasy kóterildi», - dedi «Qazgıdromet» RMK Qyzylorda oblysy boıynsha fılıalynyń bólim basshysy Áıgerim Júkelova.
Onyń aıtýynsha, 2-4 shilde aralyǵynda Qyzylorda oblysy boıynsha jańbyr jaýyp, naızaǵaı jarqyldaıdy. Bul batys bóliktegi Oraldyń ońtústiginen kelgen tsıklonnyń áserinen oryn alyp otyr. Nátıjesinde aýa raıy kúndiz 30-35, túnde 15-20 gradýs aralyǵynda bolady degen boljam bar.
«Aýa raıynyń qatty ystyqtan salqynǵa aýysýyna baılanysty burshaq bolýy yqtımal. Sonymen qatar, batystan soqqan jeldiń jyldamdyǵy 15-20, keı jerlerde sekýndyna 20-25 metrdi quraýy múmkin. Qazirgi tańda tabıǵattyń bul qubylysy Qarmaqshy aýdanynda baıqalyp otyr. Shilde aıy oblys boıynsha jaýyn-shashynnyń az bolýymen sıpattalady. Shildeniń 4-nen keıin aýa temmeratýrasy 35-40 gradýsqa kóteriledi. Odan keıingi ekinshi jáne úshinshi onkúndikte aýa temperatýrasy 45-46 gradýsqa kóteriledi dep boljanyp otyr», - dedi Áıgerim Júkelova.