Qyzylordada asyl tuqymdy mal urlaǵandar quryqtaldy
ASTANA. Qarashanyń 9-y. QazAqparat /Aıdar Ospanalıev/ - Qarashanyń 3-i kúni belgisiz bireýler Qyzylorda oblysyndaǵy aýyldardyń birindegi úıge basyp kirip,
aspanǵa qarata oq atyp, úı ıesiniń 10 myń AQSh dollary turatyn asyl tuqymdy jylqysyn tartyp alǵan. Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, osy is boıynsha júrgizilgen jedel-izdestirý sharalarynyń barysynda oblys ortalyǵynyń 4 turǵyny ustalǵan. Olardyń kishisi 15 jasta bolsa, úlkeni - 27 jasta. Atalmysh oqıǵa boıynsha qylmystyq is qozǵalyp, jylqy ıesine qaıtarylǵan.
Departament bastyǵynyń málimetteri boıynsha, respýblıkada qarashanyń 1-i men 8-i aralyǵynda 2 myń 85 qylmys jasalyp, onyń
1 myń 608-niń izi sýymaı ashylǵan. Sondaı-aq buryn jasalǵan 403 qylmys áshkerelendi. Qylmys jasaǵany úshin izdeýde júrgen 70 kúdikti qolǵa tústi. «Apta ishinde elde esirtkimen baılanysty 125 qylmys tirkeldi. Onyń 41-i - esirtkini saýdalaý. Zańsyz aınalymnan 30 keli esirtki alynsa, onyń 250 gramy - geroın», dedi Q.Jumanov.
Sondaı-aq onyń derekterine qaraǵanda, ótken aptada respýblıkada uıymdasqan qylmystyq áreketter boıynsha 5 qylmystyq is qozǵalyp, uıymdasqan toptyń 2 múshesi qolǵa túsken. Al Soltústik Qazaqstan oblysynda kóptegen urlyq jasaǵan «Never» degen laqap aty bar uıymdasqan qylmystyq toptyń belsendi múshesi ustaldy. «Almaty qalasynda «Almaty-Bishkek» jolynyń boıynda «Jibek» meımanhanasynda jezókshelikpen aınalysatyn oryn uıymdastyrǵany úshin 18 ben 38 jas aralyǵyndaǵy 4 azamat quryqtaldy. Sondaı-aq Aqtóbede jaýapkershiligi shekteýli seriktestikterdiń birinen jalǵan qujattar arqyly 2 jyl ishinde 5 mıllıonǵa jýyq teńge urlaǵan 55 jasar azamat ustaldy», dedi departament bastyǵy.
