Qyzylordada Asqar Jumadildaev úzdik jas matematıkterge syılyq tabystady
QYZYLORDA. QazAqparat - Qyzylorda qalasynda 14-29 jas aralyǵyndaǵy jastarǵa Asqar Jumadildaev atyndaǵy «Úzdik jas matematık» syılyǵy berildi. Úzdik dep tanylǵan 10 jasqa Asqar Jumadildaev arnaıy sertıfıkattar men 100 myń teńge syıaqy tabystady, dep habarlaıdy QazAqparat tilshisi.
Atalmysh syılyqty uıymdastyrýǵa Qyzylorda qalasy ákimdigi qarjylaı qoldaý bildirip keledi. Marapattaý rásiminde A. Jumadildaev jas matematıkterdi qoldaýǵa arnalǵan arnaıy syılyq elimiz boıynsha tek Qyzylorda qalasynda ǵana ekendigin erekshe maqtanyshpen aıtyp, kelesi jyldy osy jobanyń aýqymyn keńeıtýdi usyndy.
Qyzylorda qalasynda jyl saıyn dástúrli túrde uıymdastyrylatyn bul baıqaý respýblıka kóleminde óte tanymal jáne sátti jobanyń birine aınaldy. Sondyqtan ol jas matematıkter arasynda zor suranysqa ıe bolyp keledi.
«Meniń atymmen atalatyn túrli baıqaý jáne syılyq uıymdastyrǵysy kelip usynys bildirgen qaltaly azamattar men mekemeler kóp. Biraq, barlyǵy tek sóz júzinde qalyp qoıdy. Al, tikeleı jas matematıkterge arnalǵan Asqar Jumadildaev atyndaǵy «Úzdik jas matematık» syılyǵyn taǵaıyndap, ony jyl saıyn dástúrli túrde uıymdastyryp kele jatqan tek Qyzylorda qalasynyń ákimdigi. Al ǵylymnyń naqty bir salasyna osylaısha baıqaý uıymdastyryp, ony turaqty túrde qoldap bildirgen jerlesterime rızashylyq bildirgim keledi», - dedi Asqar Jumadildaev.
Sondaı-aq, atalmysh shara barysynda Syr óńiriniń damýyna úlken úles qosyp júrgen 10 jalyndy jasqa qala ákiminiń «Samǵaý» syılyǵy men 100 myń teńgeden syıaqy tabystaldy.
