Qyzylordada «Ashyq» júıesi arqyly oqshaýlaný tártibin buzǵan 1111 azamat anyqtaldy
Oblysta karantın talaptarynyń saqtalýyna monıtorıng júrgizý jalǵasýda. Jyl basynan beri búgingi kúnge deıin monıtorıngtik toptardyń reıdtik tekserisi nátıjesinde 14 386 nysan qamtyldy. Nátıjesinde 788 karantın talabyn buzýshylyq anyqtaldy. Atalǵan derekter boıynsha QR Ákimshilik quqyq buzýshylyq týraly kodeksiniń 425 babynyń 1-bóligimen ákimshilik aıyppul salyndy. Olardyń jalpy somasy 51 mln teńgeni quraıdy. Degenmen karantın talaptaryn buzý áreketteri áli de jalǵasýda. Jyl basynan beri 500-den astam toı ótkizilgeni anyqtaldy.
«Oblys kóleminde «Ashyq» júıesi úı karantıninde oqshaýlaný tártibin buzǵan 1111 azamat anyqtaldy. Onyń ishinde 727 adam «qyzyl», 220 tulǵa «sary» mártebege ıe. Oqshaýlaý rejımin buzýshy «qyzyl» mártebedegi azamattarǵa qatysty 154 jeke tulǵaǵa qatysty ákimshilik hattamalar toltyryldy. Olarǵa 7 mln teńgege jýyq aıyppul salyndy. Anyqtalǵan «sary» mártebesindegi 220 tulǵaǵa sanıtarııalyq-indetke qarsy profılaktıkalyq is-sharalardy júrgizý týraly 220 qaýly taǵaıyndaly», Oblystyq sanıtarlyq-epıdemıologııalyq baqylaý departamentinen.
Vedomstvo málimetinshe, búgingi kúni vaktsınalardyń 1-komponentimen ekpe alǵandar sany - 303 632 adam. Bul tıisti kontıngenttiń 75,1% quraıdy. Al 2-komponentpen 254 815 adam ekpe aldy.
Eske salsaq, Qyzylorda oblysynda 3 607 nysan «Ashyq» júıesine qosylǵan.
