Qyzylordada asa iri kólemde bıýdjet qarjysyn jymqyrǵan sheneýnikterdiń ústinen is qozǵaldy
Bul qylmystyq isti Qyzylorda oblysy boıynsha Ekonomıkalyq tergep-tekserý departamenti qolǵa aldy. Departament mamandary asa iri kólemde ınvestıtsııalyq sýbsıdııa qarajatyn talan-tarajǵa salyp, ári qaraı jymqyrý deregi negizinde jumys júrgizýde. Bul boıynsha oblystyq aýyl sharýashylyǵy basqarmasy qyzmetkerlerine qatysty QR Qylmystyq kodeksiniń 189-babynyń 4-bóliginiń 2-tarmaǵymen qylmystyq is tergelýde.
«Oblystyq aýylsharýashylyq basqarmasynyń birneshe laýazymdy tulǵasy ózderiniń qyzmet babyn paıdana otyryp keleńsiz jaǵdaılarǵa jol bergen. Oblys aýmaǵynda 2019-2020 jyldarǵa arnalǵan birneshe joba boıynsha ınvestıtsııalyq sýbsıdııa qarajatyn úlestirý barysynda birneshe kásipkerlik nysandarymen kelisimge kelgen. Sol arqyly asa iri kólemde memleket qarjysyn talan-tarajǵa salyp, jymqyrýdy júzege asyrǵan. Atalǵan qyzmetkerler birqatar sharýa qojalyqtarynda eshqandaı jumys atqarylmasa da, jabdyqtar múldem qoıylmasa da, olardyń tolyq oryndalǵany týraly jalǵan hattama toltyryp, oǵan qol qoıǵan. Júrgizilgen sot-qurylys saraptamalary negizinde birneshe sharýa qojalyqtary boıynsha memleketke keltirilgen zalal somasy 26 mln 792 myń teńgeni qurap otyr», - dep málim etti Qyzylorda oblysy boıynsha ekonomıkalyq tergep-tekserý departamentiniń baspasóz qyzmeti.
Vedomsto málimetinshe, QR Qylmystyq kodeksiniń 189 baby 4-bóliginiń 2-tarmaǵy boıynsha mundaı qylmysqa jol bergen azamattar belgili bir laýazymdardy atqarý quqyǵynan ómir boıyna shektelip, olarǵa jeti jyldan on eki jylǵa deıingi merzimge bas bostandyǵynan aıyrý jazasy kózdelgen.
Eske salsaq, budan buryn Qyzylordada munaı ónimin zańsyz satqan 25 jastaǵy turǵyn sottalǵanyn habarlaǵan bolatynbyz.