Qyzylordada arzan kólik almaqshy bolǵan azamat aqshasynan aıryldy
QYZYLORDA. QazAqparat - Qyzylorda oblysy Jańaqorǵan aýdanynyń turǵyny arzan kólik alamyn degen nıetpen alaıaqtarǵa aldanyp qaldy, dep habarlaıdy QazAqparat tilshisi.
Jańaqorǵan aýdanynyń turǵyny jarnamalyq saıttardyń birinen Germanııadan naryqtaǵy baǵadan eki ese arzanǵa kólik jetkizip beremin degen alaıaqtarǵa aldanyp qaldy. Ol bul usynysty qup kórip, alaıaqtyń esep-shotyna 5 myń AQSh dollaryn salyp jiberedi. Alaıda kólikten de, aqshadan da eshbir habar bolmaıdy. Óziniń aldanyp qalǵanyn túsingen turǵyn polıtsııa qyzmetkerlerine aryzdandy.
«Sońǵy jyldarda Qyzylorda oblysynda alaıaqtyq deregi órship tur. Bıylǵy jyldyń ózinde osyndaı 414 derek tirlkelgen. Olardyń arasynda ınternet arqyly alaıaqtyq jasaý áreketteri oılandyrady. Sondyqtan turǵyndarǵa bul turǵyda saq bolǵany jón», - deıdi oblystyq ishki ister departamentiniń baspasóz qyzmetiniń mamandary.
Qazirgi tańda oblysta arzan baǵada páter alyp beremin, jumysqa turǵyzamyn, jer alyp beremin degen sekildi ýáde beretin alaıaqtar qatary kóbeıgen. Olardyń arasynda áıelder sany basym bolyp tur.
