Qyzylordada aptap ystyqtan jedel járdemge júgingender kóbeıdi
QYZYLORDA. QazAqparat - Qyzylorda oblysynda aýa raıynyń asa qatty ystyq bolýyna baılanysty jedel járdem qyzmetine júgingen turǵyndar sany artyp ketken, dep habarlaıdy QazAqparat tilshisi.
Shildeniń alǵashqy eki aptasy óńirde aptap ystyqpen erekshelendi. Saldarynan dárigerler kómegine júgingender qatary az bolmaı otyr.
«Sońǵy eki aptada jedel járdem qyzmetin shaqyrtqan turǵyndar sany artty. Atap aıtqanda, 1-7 shilde aralyǵynda dárigerler 10951 adamǵa medıtsınalyq qyzmet kórsetti. Ol 8-14 aralyǵynda 11049 adamǵa jetti. Aýa-raıyna baılanysty demsaýlyǵy syr bergen azamattar sany óskeni ańǵarylyp otyr. Olardyń arasynda júrek-qan tamyrlary aýrýy birinshi orynda tursa, odan keıingi kezekte - tynys alý dertteri», - dedi Qyzylorda oblystyq densaýlyq saqtaý basqarmasynyń basshysy Jaqsylyq Ábdýsámetov.
Syr óńirinde ystyq aýa-raıy áli de saqtalady. Bul jóninde «Qazgıdromet» RMK Qyzylorda oblysy boıynsha fılıalynyń bólim basshysy Áıgerim Júkelova málim etti.
«Qyzylorda oblysyna jyly aýa massasynyń enýine baılanysty ystyq aýa raıy áli de saqtalady. Ol 20 shildege deıin sozylady dep kútilýde. Erteń, 16 shildede bizdiń aımaqta aýa temperatýrasy 39-44 gradýsqa kóterilmek. Al 17 shildede ol 41-46 gradýsqa deıin joǵarylaıdy. Oblystyq soltústiginde oryn tepken Qazaly, Aral aýdandarynda ol 35-37 gradýsty quraıdy. Osy kúnderde soltústik shyǵystan soqqan jeldiń ekpini de kúsheıte túsedi. Al 20 shildeden keıin tsıklonnyń enýine baılanysty aýa temperatýrasy birshama tómendeıdi. Aı sońyna taman jańbyr jaýady», - dedi Áıgerim Júkelova.
Esterińizgesala ketelik, shilde aıynyń 2-si kúni Qyzylorda oblysynda aýa temperatýrasy rekordtyq kórsetkishke jetti. Aýa temperatýrasy 47 gradýsty qurady .
