Qyzylordada aptap ystyq jalǵasady
QYZYLORDA.QazAqparat- «Qazgıdromet» respýblıkalyq memlekettik kásiporny Qyzylorda gıdrometeorologııa ortalyǵynyń habarlaýynsha, 5-7 shilde kúnderi kúndiz Qyzylorda oblysynda synap baǵanasy 41-46 gradýsqa deıin kóteriledi. Bul týraly «QazAqparat» HAA tilshisi habarlady.
Osyǵan baılanysty Ońtústik óńirlik aeroutqyr jedel-qutqarý jasaǵynyń qutqarýshylary oblys turǵyndary men qonaqtaryna qaýipsizdik sharalaryna nazar aýdarý qajettigin eskertedi.
Mundaı kúnderi turǵyndardyń kópshiligi darııa jaǵasynda shomylady. Sýǵa túsýshiler qatary kúrt kóbeıetin aptapty merzim qutqarýshylar úshin de qarbalasqa toly bolady.
Ońtústik óńirlik aeroutqyr jedel-qutqarý jasaǵynyń basshysy Baqyt Embergenov BAQ-qa bergen suhbatynda jyl basynan beri sý aıdyndarynda 10 adam kóz jumǵanyn, onyń úsheýi kámeletke tolmaǵandar ekenin atap ótti. Qutqarýshylar barlyq aımaqty qadaǵalaı almaıdy. Qaýipsizdikti saqtaý jóninde eń aldymen, sýǵa túsýshiniń ózi oılanýy kerek.
