Qyzylordada apatty baspanada turyp kelgen 143 otbasyǵa jańa páter berildi
QYZYLORDA. QazAqparat - Búgin Qyzylorda qalasyndaǵy Jappasbaı batyr kóshesinde 3 kópqabatty turǵyn úı paıdalanýǵa berildi. Atap aıtqanda, baspanasy apatty den tanylǵan 143 otbasyna páter kiltteri saltanatty túrde tabystaldy, - dep habarlady QazAqparat tilshisi.
Jańa baspana ıelerin quttyqtaý úshin oblys ákimi Qyrymbek Kósherbaev jáne qala ákimi Nurlybek Nálibaev saltanatty sharaǵa arnaıy qatysyp, óz qoldarymen páter kiltterin úlestirdi.
«Nurly jer» baǵdarlamasy arqyly «Dáneker», «Orıon LTD» jáne «Astana servıs» jaýapkershiligi shekteýli seriktestikteri turǵyzǵan bul 5 qabatty úıler 2 jáne 3 bólmeli páterlerden turady.
Saltanatty shara barysynda jańa páter ıeleriniń atynan sóz alǵan Raısa Erjanova óz qýanyshymen bólisti. «Halyqtyń turmys jaǵdaıynyń jaqsarýyna bar múmkindikti jasap otyrǵan Elbasymyzǵa jáne bizdi osyndaı qýanyshqa bólep otyrǵan el aǵalaryna alǵysymyz sheksiz. Bir apta buryn jańa baspana alasyńdar dese senbes edim, búgin mine kútpegen jerden jańa páterdiń kiltin alyp, baqytqa bólenip turmyz. Úıimiz apatty jaǵdaıda ekenin esitigende, boıymyzdy úreı bılegeni jasyryn emes. Endigi kúnimiz qalaı bolar eken dep qatty ýaıymdap edik. Bulaı tez baspanaly bolamyz dep tipti oılamadyq. Sizderge barsha turǵyndardyń atynan úlken rahmet», - dedi ol. 
Esterińizge sala keteıik, bıylǵy jyly naýryz aıynyń basynda oblys ákiminiń tapsyrmasymen oblys kóleminde ornalasqan jataqhanalardyń jaǵdaıyn zertteý úshin arnaıy komıssııa qurylǵan bolatyn. Komıssııa Qyzylorda qalasynda ornalasqan 22 jataqhananyń jaı-kúıin zerttep, qorytyndysymen Tıtov qystaǵyndaǵy №32 jataqhana ǵımaratyn apatty dep tanyǵan. Osyǵan sáıkes, bul jataqhananyń turǵyndaryn jańa baspanamen qamtý maqsatynda shuǵyl sharalar qabyldanǵan bolatyn.
