Qyzylordada angıografııalyq zerthana qurylady
QYZYLORDA. QazAqparat - Qyzylordada 2 angıografııalyq zerthana qurylatyn boldy, dep habarlaıdy QazAqparat tilshisi.
Osy maqsatta memlekettik-jekeshelik áriptestik aıasynda kelisimshartqa qol qoıyldy. Atalmysh shara barysynda oblys ákimi Qyrymbek Kósherbaev óńirdiń áleýmettik máselelerin sheshýde memlekettik-jekeshelik áriptestik aıasyndaǵy jobalardyń mańyzdylyǵyn atap ótti.
«Biz osynyń nátıjesinde oblystyq medıtsınalyq ortalyq pen Qazaly aýdandyq ortalyq aýrýhanasynda angıografııalyq zerthana qurýǵa qol jetkizemiz. Barlyq qajetti sharalar júrgizildi. Qazirgi tańda aımaqta memlekettik-jekeshelik áriptestik aıasynda quny 34 mlrd. teńge bolatyn 75 joba iske asyrylýda», - dedi Qyrymbek Kósherbaev.
Oblystyq densaýlyq saqtaý basqarmasynyń basshysy Aqmaral Álnazarovanyń aıtýynsha, qazirgi tańda aımaqta 2009 jyly oblystyq medıtsınalyq ortalyq bazasynda ornatylǵan jalǵyz angıografııalyq qondyrǵy bar. Sonyń kómegimen 5 myńnan astam zertteý júrgizilip, operatsııa jasalǵan. Normatıvterge sáıkes, 1 angıografııalyq qondyrǵy 250 myń adamǵa eseptelgen. Aımaqta oǵan jalpy qajettiliktiń tek 40 protsenti ǵana qamtylǵan.
«Angıografııalyq zerthanalardyń qurylýymen qatar, alǵash ret aýdandyq aýrýhana deńgeıinde MJÁ aıasynda endovaskýlıarlyq hırýrgııa engiziledi, bul joǵary tehnologııalyq medıtsınalyq qyzmetterdi halyqqa qoljetimdi etýge múmkindik beredi», - dedi A. Álnazarova.
Ótken jyly «Medtronık Qazaqstan» JShS Qyzylorda oblysynda memlekettik-jekeshelik áriptestik aıasynda jeke qarjylyq esebinen 2 angıografııalyq qondyrǵy qurý týraly bastama kótergen edi.
Aıta keterligi, angıografııalyq zerthana júrek-qan tamyrlary júıesi syrqatyna shaldyqqandarǵa mamandandyrylǵan emdeý-dıagnostıkalyq kómek kórsetýge arnalǵan.
Illıýstratsııalyq foto: volynka.ru
