Qyzylordada analar alleıasy ashyldy

Qyzylorda oblysynyń ákimi Qyrymbek Kósherbaev «Begim ana» kóshesindegi "Ana baqyty" eskertkishi janynan bastaý alatyn alleıanyń ashylýymen qala turǵyndaryn quttyqtady, dep habarlaıdy oblystyq ákimdiktiń baspasóz qyzmeti.
 

"Ultymyzdyń arǵy-bergi shejiresinde erine adal jar, balasyna ardaqty ana bolýymen urpaqqa ónege, otbasyna uıytqy, ultqa uran bolǵan Analarymyz barshylyq. Tarıhtyń qaı paraǵyn aqtarsań da tegi asyl apa-analarymyzdyń ónegeli isi, aıshyqty júzi men ǵıbratty sózine qanasyń. Begim sulý, Qurtqa, Qyz Jibek, Qarashash, Aıman, Domalaq ana sııaqty aqyly asqan, dana apa-analarymyzdyń beınesi asyl mura retinde urpaǵynyń sanasynda saqtalady. Bul jer anasy men balasynyń, otbasylardyń demalyp, tárbıelik máni bar kezdesýler ótkizetin, Elbasynyń aıtýynsha, «Alashtyń anasy - Syr óńirindegi» birden-bir súıikti ornyna aınalýyna tilektespin", - dedi oblys ákimi. 
 

Aıta keteıik, alleıa qurylysyna «Abzal ı K» kompanııasy 44 mln. teńge bóldi. «Ana baqyty» eskertkishiniń avtory - músinshi Aǵabek Nazarov, bıiktigi - 5,5 metr.

Qyzylorda oblysynda 34700 kóp balaly ana bar. Onyń 17742-si -  "Altyn alqa" jáne "Kúmis alqa" ıegeri.