Qyzylordada «Altyn dán» merekesi atalyp ótti
Mereke aıasynda oblystyń barlyq aýdandary men qala tóńiregindegi eldimekenderiniń qatysýymen dástúrli aýylsharýashylyǵy ónimderiniń jármeńkeleri uıymdastyryldy.
Qyzylorda oblysynyń sharýalary 1500 tonnaǵa jýyq aýylsharýashylyǵy ónimin - kókónis, baqsha jáne sút ónimderin, balyq, sondaı-aq qoı men eshki ákeldi. Aıta keteıik, barlyq ónim oblys ortalyǵynda naryqtyq baǵadan tómen baǵamen satyldy.
Sonymen qatar, jármeńke alańdarynda kontserttik baǵdarlamalar, ulttyq sport túrlerinen jarystar jáne basqa da oıyn-saýyq sharalary uıymdastyryldy.
N. Bekejanov atyndaǵy Qyzylorda oblystyq qazaq mýzykalyq drama teatrynda «Altyn dán» merekesine arnalǵan saltanatty jıyn ótti.
Oblys ákimi Q.Kósherbaev Jańaqorǵan jáne Shıeli aýdandarynyń jármeńkelerine baryp, dıqandardy egin jınaý naýqanynyń sátti aıaqtalýymen quttyqtady.
«Memleket basshysynyń aýyl sharýashylyǵy salasyn damytýǵa jasaǵan qamqorlyǵynyń arqasynda sońǵy jyldary oblystyń agrarlyq sektorynda serpindi damý dınamıkasy qalyptasyp keledi. Sońǵy 5 jylda agrarlyq sektorda óndirilgen ónim kólemi 16,4 mlrd.teńgege ósti. Osy jyldary aýyl sharýashylyǵyna salynǵan ınvestıtsııa kólemi 23 esege, tamaq ónimderin óndirýge salynǵan ınvestıtsııa 5 esege ulǵaıdy. Bıylǵy jyldyń aýa raıy, ásirese, mamyr-maýsym aılaryndaǵy aýa temperatýrasynyń ádettegiden salqyn bolýy, sonymen birge, vegetatsııa kezinde josparly sýmen qamtamasyz etýdegi oryn alǵan qıynshylyqtar oblysta asa kúrdeli jaǵdaı qalyptastyrdy. Desek te, «Eginshi márt, jer jomart» degendeı, dıqandarymyz jańa zamanaýı astyq jınaıtyn tehnıkalardy tıimdi paıdalana otyryp, uıymshyldyqpen aıanbaı etken eńbektiń arqasynda astyqty ysyrapsyz jınap, mine, búgin biz dala eńbekkerleriniń jemisti eńbekteriniń merekesin shat kóńilmen toılaýdamyz. Bıyl da sońǵy jyldaǵy qarqyndy saqtaı aldy, 500 myń tonnaǵa jýyq Syr marjany el qazynasyna quıyldy»,-dedi aımaq basshysy.
Esterińizge sala keteıik, Memleket basshysynyń tapsyrmasyn júzege asyrý aıasynda aımaqtaǵy Agrokarta sheńberinde aýylsharýashylyq ónimderi túrlerin jáne eksport kólemin ulǵaıtyp ishki naryqtyń suranysyn qamtamasyz etý boıynsha jumystar júrgizilýde. Máselen, Syr óńiriniń kúrishi Monǵolııa, Túrkııa, Aýǵanstanǵa eksporttalyp, sondaı-aq, Iranǵa eksport jasaý josparlanýda. Ózbekstan, Iran jáne Birikken Arab Ámirlikterine sıyr jáne qoı, eshki eksporttalsa, kókónister pen baqsha ónimderi - Qytaı men Reseıge, taǵy basqa elderge jetkiziledi.
Bıyl Qyzylorda oblysynyń agroónerkásiptik kesheninde jalpy quny 7,1 mlrd teńge bolatyn 10 joba júzege asyrylýda. Bular - halyqaralyq standarttarǵa sáıkes keletin et kombınaty men Qyzylorda qalasyndaǵy 2 gektarlyq avtomattandyrylǵan jylyjaı, Qarmaqshy aýdanynda jylyna 1500 tonna qus etin óndiretin qus fabrıkasy, Shıeli aýdanynda 1200 basqa arnalǵan taýarly sút fermasy, Jalaǵash, Syrdarııa, Shıeli, Jańaqorǵan aýdandaryndaǵy mal bordaqylaý alańdary.
