Qyzylordada alty úıdiń qorasy órtenip ketti
QYZYLORDA. QazAqparat - Qyzylorda oblysynda alty úıdiń mal qorasy órtenip, saldarynan 2000 danaǵa tarta prestelgen shóp jáne ózge de dúnıeler janyp ketti, dep habarlaıdy QazAqparat tilshisi.
Oqıǵa Jalaǵash aýdanyna qarasty Tań aýylynda búgin, tańǵy saǵat 5.00 shamasynda boldy. Saldarynan birneshe úıdiń mal qorasy órtenip ketti.
Monsha, presstelgen shóp, taqtaılar, jem jáne 1 jylqy tilsiz jaýdyń qurbanyna aınaldy. Sonyń saldarynan 900-den astam sharshy metr aýmaqqa zııan keldi.
«Oqıǵa ornynda Qyzylorda oblysy Tótenshe jaǵdaılar departamenti «Órt sóndirý jáne avarııalyq-qutqarý jumystary qyzmetiniń» aýdandaǵy birinshi bólimshesi órt sóndirý jumystaryn atqardy. Jalyn 1 órt sóndirý avtokóligi 10 qyzmetkeriniń kúshimen tolyq sóndirildi. Qaza bolǵandar men zardap shekkender joq. Órtti sóndirýge Tań aýylyndaǵy erikti órtke qarsy kúsh qurylymdarynyń 6 adamy atsalysty», - deıdi Qyzylorda oblystyq tótenshe jaǵdaılar departamenti baspasóz qyzmetiniń jetekshisi Aıgúl Nurmanova.
Eske sala keteıik, budan buryn Qyzylordada statsıonarlyq polıtsııa beketi órtengenin jazǵan bolatynbyz.
