Qyzylordada alǵys sózder jazylǵan sharlar kókke ushyryldy
QYZYLORDA. QazAqparat - Qyzylorda qalasynda Alǵys aıtý kúnine oraı «Alǵys - el syıy» atty merekelik kesh ótti, dep habarlady QazAqparat tilshisi.
Oǵan oblys ákimi, oblystyq QHA tóraǵasy Qyrymbek Kósherbaev, oblystyq Qazaqstan halqy Assambleıasy men etnomádenı birlestik músheleri, tótenshe jaǵdaı, jedel járdem jáne áleýmettik kómek qyzmetkerleri, aq jaýlyqty analar, aǵa býyn men ustazdar qaýymy, qala turǵyndary jáne respýblıkalyq, jergilikti BAQ ókilderi qatysty.
Dostyq úıiniń aldynda etnomádenı birlestikter basshylary men belsendileri jáne jastardan quralǵan top aspanǵa alǵys jazylǵan sharlardy ushyrdy. Tilek-alǵys sózder jaqsy isterdiń bastaýy bolsyn degen nıetpen sharaǵa kelgen qonaqtar «Tilek aǵashyna» izgi lebizderi jazylǵan paraqshalardy ildi.
Aımaq basshysy jınalǵan jurtshylyqty mereıli merekemen quttyqtap, ystyq lebizin bildirdi.
Júrekti jylytar jyly sóz, bir-birine jaqsylyq jasaý, rızashylyq sezim, aq tilekpen alǵys bildirý - adamzat balasynyń eń izgi qasıetteri ekeni belgili. «Alǵys arqalaǵan asyl jandarǵa» patronattyq tárbıe berýshi otbasylarǵa, júregi meıirimdilikke toly jedel-járdem jáne adam ómiri men densaýlyǵyn saqtap qalý jolynda aıanbaı eńbek etip júrgen tótenshe jaǵdaı qyzmetkerleri, sondaı-aq áleýmettik kómek kórsetýshilerge erekshe iltıpat kórsetildi.
El muraty úshin jasap júrgen berekeli isteri úshin oblys basshysyna, Ekinshi dúnıejúzilik soǵys ardagerlerine, tynyshtyqtyń baǵasyn bilip, beıbit ómir úshin uıqysyz tún qatqan shekarashylarǵa, erte kóktemnen sarala kúzge deıin tynbaı eńbek etip júrgen Syr dıqandaryna, qalamyzdyń sáýletine sán kirgizgen qurylysshylarǵa arnalǵan alǵys aıtylǵan arnaıy telegrammalar oqyldy.
Aıta ketý kerek, bul mereke áleýmettik yntymaqty jáne ózara kómek kórsetýdi qoldaý kúni bolyp tabylady. Osy oraıda, jarqyn mereke ásem ánmen jáne kórkemónerpazdardyń myń buralǵan bıimen jalǵasyn tapty.
