Qyzylordada alǵash ret Kórisý kúni ótedi
QYZYLORDA. QazAqparat - Bıyldan bastap Syr óńirinde Ulystyń Uly kúni qarsańynda Kórisý merekesin atap ótýge nazar aýdarylyp otyr. Bul shara oblys ákimdiginiń qoldaýymen Qyzylorda oblysynda alǵash ret toılanbaqshy, dep habarlaıdy QazAqparat tilshisi.
Ol jóninde QazAqparat tilshisine oblystyq «Rýhanı jańǵyrý» ortalyǵynyń basshysy Nurlybek Myńjas málim etti. Onyń aıtýynsha, 14 naýryzda Qyzylorda qalasynyń «Syr súleıleri» alleıasynda Kórisý kúni atap ótiledi. Atalmysh sharany ıgi dástúrge aınaldyrǵan elimizdiń batys óńirindegi oblys turǵyndarynyń tájirıbesine súıene otyryp, Qyzylorda oblysynda da keń aýqymda toılanatyn bolady.
«Naýryz merekesi aıasynda toılanatyn Kórisý dástúrine aqsaqaldarmen birge jastar da qatysady. Tós qaǵystyryp, qol alysý, úlkenderden bata alý, adamdar arasyndaǵy syılastyq, qaýyshý merekesi - Kórisý kúniniń keıingi urpaqqa ónegesi mol. Jalpy, bul kúnniń negizgi sharttary - úlkendi syılaý, kishige qamqorlyq, álsizdi demeý, jarlyny jarylqaý. Osynyń nátıjesinde halyqty yntymaqqa, uıymshyldyqqa, bireke-birlikke bastaıtyn ǵıbratty dástúrin dáripteı alamyz», - deıdi N.Myńjas.
Búgingi tańda bul dástúr elimizdiń batys aımaǵynda keńinen nasıhattalyp keledi. Degenmen, keıbir etnograf ǵylymdardyń aıtýynsha, ol erterekte elimizdiń kóptegen óńirlerinde tán dástúr bolǵan eken.
Bul jóninde fılologııa ǵylymdarynyń kandıdaty Serikbaı Qosan «Etnograf ǵalymdar bul dástúr burynǵy ýaqytta naýryzdyń alǵashqy kúninen bastap toılanǵanyn alǵa tartady. Ol elimizdiń batys óńirimen qosa Syr boıynda, Qostanaı, Torǵaı aımaǵynda, reseılik Astrahan, Saratov, Samar, Orynbor oblystarynda turatyn qazaqtar arasynda atap ótilgen eken. Biraq, ony amal nemese kórisý degen de ataýy bolmaǵan. Jalpylaı aıtqanda «Naýryz» degen ataý bergen. Amal degen ataý 1988 jyldan bastap elimizde merekeniń 21-22 naýryzǵa resmılenýine baılanysty shyqqan. Halyq Jyl basy sanalǵan kúnnen ajyraǵasy kelmeýine baılanysty 14 naýryzdy Amal dep ataýǵa májbúr boldy» deıdi.
Osylaısha bıyl Syr óńiri turǵyndary Ulystyń uly kúnin birneshe kún boıy atap ótýge nazar aýdaryp otyr. Onyń árbir kúninde taǵylymy mol san alýan sharalar ótkiziledi.
Ádilet QAŃTARBAEV
