Qyzylordada «Álem tanyǵan Elbasy» ıllıýstratsııalyq kitap kórmesi ashyldy
Atalmysh shara Qyzylorda oblysynda ótip jatqan Qazaqstan Respýblıkasy Tuńǵysh Prezıdenti - Elbasy kitaphanasynyń «N. Nazarbaev: dáýir, tulǵa, qoǵam» kóshpeli kórme jobasy aıasynda ótkizilip otyr.
Kórmeniń maqsaty - ómirlik jolyn qazaqstandyq memlekettiliktiń jasampazdyǵyna tolyqtaı arnaǵan Elbasynyń jan-jaqty tulǵasyn ashý.
Búginde elimizdi álem halqy jaqsy biledi. Beıbitshilik pen tatýlyqtyń altyn tuǵyryna aınalǵan táýelsiz Qazaqstan ekonomıkasy qaryshtap damyp kele jatqan irgeli memlekettiń biri sanalady. Bul oraıda joǵary jetistikke jetken jas memlekettiń qalyptasý jolynda Tuńǵysh Prezıdent - Elbasy Nursultan Nazarbaevtyń sińirgen eńbegi erekshe.
Illıýstratsııalyq kitap kórmesinde halyq nazaryna avtorlyq bıografııalyq jarııalanymdar men ocherkterdiń basty keıipkeri retinde Elbasynyń saıası jáne qoǵamdyq ómirin, qyzmetin ashatyn kitaptar jáne fotoqujattar usynyldy. Jalpy eseppen, kórmege Elbasy týraly júzden asa kitap pen Prezıdenttiń jeke kitaphanasynyń 20 fotoqujaty qoıyldy.
Esterińizge sala keteıik, 8 sáýirde oblystyq tarıhı-ólketaný mýzeıinde «N.Nazarbaev: dáýir, tulǵa, qoǵam» kórmesiniń saltanatty ashylý rásimi ótti. Al Qyzylorda qalasyndaǵy Á.Tájibaev atyndaǵy ǵylymı ámbebap kitaphanasynda «Elbasy kitaphanasynyń aqparattyq resýrstary» atty aımaqtyq kásibı sessııa ótti. Sondaı-aq, N.Bekejanov atyndaǵy drama teatrynda kontsert uıymdastyryldy. Al 9 sáýirde Qorqyt Ata atyndaǵy Qyzylorda memlekettik ýnıversıtetiniń stýdentter saraıynda «N.Nazarbaev: Bolashaq búginnen bastalady» halyqaralyq ǵylymı-praktıkalyq konferentsııa ótkizildi.
