Qyzylordada alaıaq áıel tórt turǵynnyń 1, 5 mln teńgesin úptep ketken
ASTANA. QazAqparat - Qyzylordada alaıaqtyq deregi boıynsha 41 jastaǵy azamatshanyń ústinen qylmystyq is qozǵaldy, dep habarlaıdy Qyzylorda oblystyq ІІD baspasóz qyzmeti.
Qyzylordada qala ortalyǵyndaǵy «saýda úılerdiń birinen oryn alyp beremin» degen jeleýmen 4 qala turǵynynyń senimine kirip, jalpy somasy 1 mıllıon 520 myń teńgeni quraıtyn aqshalaryn alaıaqtyq jolmen ıemdengen 41 jastaǵy áıel ustaldy.
Tórt jábirlenýshi de ishki ister organdaryna 2017 jyldyń 5 shildesinde shaǵymdanǵan. Alaıaqtyq deregi boıynsha Qazaqstan Respýblıkasy Qylmystyq kodeksiniń 190-baby 1-bóligi negizinde qylmystyq is qozǵalyp, sotqa deıingi tergep-tekserý jumystary júrgizilýde. Tergeý jumystary barysynda kúdikti 2014 jyly atalǵan azamatshalardyń senimine ıe bolyp, biriniń 500 myń, endi biriniń 460 myń, taǵy ekeýiniń 200 myń jáne 360 myń teńge aqshalaryn alǵandyǵy anyqtaldy. Alaıda bergen ýádesin oryndamaı, aqshalaryn da qaıtarmaǵan.
Qazirgi tańda kúdikti Qalalyq ishki ister basqarmasyna jetkizildi. Tergeý jumystary júrgizilýde. Kúdiktiniń is-áreketinen zardap shekken ózge turǵyndardy anyqtaý baǵytynda jumystar jasalýda.
