Qyzylordada «Aqyldy qala» jobasy iske asyrylady
QYZYLORDA. QazAqparat - Turmys sapasyn arttyrý jáne jańa ınnovatsııany keńinen taratý maqsatynda qolǵa alynǵan «Aqyldy qala» jobasy boıynsha Qyzylorda qalasynda naqty sharalar qabyldanýda.
Bul týraly qala ákimi Nurlybek Nálibaevtyń halyqqa esep berý jıynynda belgili boldy.
Endi qyzylordalyqtar kóshede de Wi-Fi tegin ınternet jelisin paıdalana alady. Oǵan dálel - búgin Nurlybek Mashbekuly tanystyrǵan «Orda Wi-Fi» jobasy. Qalanyń halyq kóp shoǵyrlanatyn demalys oryndary men saıabaqtarda aqparattyq resýrstarǵa jáne memlekettik kórsetiletin elektrondy qyzmetterge qoljetimdilikti qamtamasyz etýdi kózdeıtin joba aldymen pılottyq rejımde ortalyq kóshelerdiń birine ornatylmaq.
Sonymen qatar, qala turyǵyndary men qonaqtarynyń qala ákimdigimen tikeleı baılanys jasaýyna, máselelerdi der kezinde sheshýge arnalǵan «OA Orda» mobıldi qosymshasy iske qosylady eken.
«Aqyldy qala» jobasy jol qaýipsizdigin de esten shyǵarmapty.
«Qala kóshelerinde balalardyń qaýipsizdigin qamtamasyz etý maqsatynda bilim ordalarynyń tustaryna jaryq dıodty jol belgileri ornatylady. Sonymen birge, Jibek joly dańǵylynan salynyp jatqan jaıaý júrginshiler kópirine múmkindigi shekteýli azamattarǵa yńǵaıly jaǵdaı jasaý maqsatynda lıft ornatylýda», - deıdi shahar basshysy.
Jańa tehnologııalar jer qatynastary salasynda zań buzýshylyqtardyń aldyn alýǵa kómektesedi. GPS geodezııalyq quraly men ArcGis (AR GIS) baǵdarlamasyn qoldana otyryp zańsyzdyqty anyqtaýǵa jumsalatyn ýaqyt 15 kúnnen 2 kúnge qysqarady. Bul baǵytta 21 mln. teńge qaraldy.
Farıza OMAROVA
